ԵՐԵՎԱՆ, 2 նոյեմբերի — Sputnik. Ալավարդու պղնձաձուլական կոմբինատը վաղ թե ուշ պետք է կամ մոդեռնիզացնել, կամ փակել։
Այս մասին այսօր մամուլի ասուլիսի ժամանակ ասաց փոխվարչապետի պաշտոնակատար Տիգրան Ավինյանը։
Փոխվարչապետի պաշտոնակատարը հոկտեմբերի կեսից բանակցություններ է վարում կոմբինատի սեփականատիրոջ, VallexGroup–ի ղեկավար Վալերի Մեջլումյանի ու ՎՏԲ բանկի ներկայացուցիչների հետ`գործարանի աշխատանքը շարունակելու նպատակով։
Ավինյանը նշեց, որ երկու ընկերությունների միջև հակասություն է ծագել ու կառավարությունն այժմ փորձում է նպաստել իրավիճակի տրամաբանական հանգուցալուծմանը։
«Բանակցություններ են ընթանում, առաջիկայում դրանք կավարտվեն։ Մենք կանենք մեզանից կախված ամեն ինչ , որ լուծենք խնդիրը։ Հիմա քննարկվում է բնապահպանական ռիսկերի նվազեցման հարցը։ Բայց վաղ թե ուշ գործարանը պետք է կամ մոդեռնիզացվի, կամ փակվի», – ընդգծեց փոխվարչապետի պաշտոնականը։
Հոկտեմբերի 19–ին Ալավարդու պղնձաձուլական գործարանը կասեցրեց իր աշխատանքը, որից հետո աշխատակիցները փակել էին М6 միջպետական ճանապարհը, որը հայ–վրացական սահման է տանում։
Նրանք պահանջում էին չդադարեցնել կոմբինատի աշխատանքը։ Խորհրդային տարիներին կոմբինատը մաքուր պղինձ էր արտադրում, որը պիտանի էր արդյունաբերության համար։
Հիմա միայն խառնուրդաշատ պղինձ (կիսաֆաբրիկատ), ինչը և բնապահպանական խնդիրներ է առաջացնում։ Բանն այն է, որ խորհրդային շղթան անջատելուց հետո գործարանում արդեն չեն կարողանում ծծմբային գազեր որսալ (հանքում պղնձի հետ նաև ծծումբ կա)։ Արդյունքում գործարանը ծծմբային անհիդրիդ է արտանետում, ընդ որում` սահմանային թույլատրելի կոնցենտրացիան բարձր (տարեկան 5,6 հազար տոննայի փոխարեն 38 հազար տոննա)։
Բնապահպանության և ընդերքի տեսչական մարմնի կողմից 2018թ. օգոստոս ամսին Ընկերությունում իրականացրած ստուգման արդյունքում Ընկերությանը ներկայացվել է 380 մլն դր. լրացուցիչ տուգանքի ակտ, որը վերաբերում է 2015թ. հուլիսից մինչև 2018թ. հուլիս ընկած ժամանակահատվածի արտանետումներին:
Իրավիճակը սրվել է այն պատճառով, որ գործարանը պարտք է ՎՏԲ բանկին։ Գործարանը բանկին չի վճարել 500 միլիոն դոլար վարկն ու տոկոսները, ինչի հետևանքով կոմբինատը բանկի սեփականությունն է դարձել։
