ԵՐԵՎԱՆ, 2 նոյեմբերի — Sputnik. Կուսակցությունը կամ դաշինքը, որը Նիկոլ Փաշինյանին կաջակցի Հայաստանի վարչապետ պաշտոնում և կանցնի խորհրդարան, ստիպված կլինի ինստիտուցիոնալ առումով հասունանալ և վերածվել իսկական քաղաքական ուժի, այնպես որ ամենահետաքրքիրը կսկսվի արդեն ընտրությունների հետո։ Այսօր հրավիրված ասուլիսի ժամանակ այս մասին ասաց քաղաքագետ, Կովկասի ինստիտուտի տնօրեն Ալեքսանդր Իսկանդարյանը։
Հայաստանի ԿԸՀ–ն նոյեմբերի 2–ի նիստում հաստատել է Ազգային ժողովի արտահերթ ընտրություններ անցկացնելու ժամանակացույցը, որի համաձայն` ընտրությունները տեղի կունենան 2018թ–ի դեկտեմբերի 9–ին, նախընտրական քարոզարշավը կմեկնարկի նոյեմբերի 26–ին։
«Ամենահետաքրքիրը սկսվելու է ընտրություններից հետո։ Այն ամենը, ինչ կարող էր տեղի ունենալ մինչ այդ, տեղի է ունեցել ապրիլի վերջին, մայիսի սկզբին։ Ինչպե՞ս կձևավորվի իշխող կուսակցությունը, որտեղի՞ց են վերցնելու այն մարդկանց, որոնք պետք է անցնեն խորհրդարան` հաշվի առնելով կարճ նախընտրական քարոզարշավը։ Ահա թե որն է հարցը», – ասաց Իսկանդարյանը
Նա նշեց, որ Փաշինյանի կուսակցությունում` «Քաղաքացիական պայմանագրում», «քասթինգն» արդեն սկսվել է։ Մարդիկ մի կուսակցությունից անցնում են մյուսը։
Այսպես, երեկ «Ժառանգությունից» ՔՊ անցնելու մասին է հայտարարել Հայաստանի Պետական վերահսկողական ծառայության պետ Դավիթ Սանասարյանը։
Իսկանդարյանի կանխատեսումով` խորհրդարան կանցնեն կոմպետենտության տարբեր աստիճան ունեցող տարատեսակ մարդիկ, որոնց պետք է համախմբել և միավորել մեկ գաղափարախոսության շուրջ։ Առայժմ անհասկանալի է, թե ինչի շուրջ են նրանք միավորվելու։ Անհասկանալի է, թե ինչպես նոր իշխանությունները կկառուցեն քաղաքական կուսակցությունը և ինչպես կարձագանքեն ցածր լեգիտիմության դեպքում` հաշվի առնելով այն, որ նրանք վարժվել են աշխատել բարձր լեգիտիմության պայմաններում։
«Լեգիտիմությունը, որն ունեն Փաշինյանը և նրա կողմնակիցները, ոչ թե ինստիտուցիոնալ է, այլ զանգվածային–սոցիալական։ Հետևաբար, այն չի կարող հավերժ տևել, ուստի ընտրությունները տեղի կունենան հիմա», – ասաց Իսկանդարյանը։
Ընդհանուր առմամբ Հայաստանի ներքաղաքական կյանքում ընթանում է իշխանության փոխանցումն ավարտելու գործընթաց։ Իսկանդարյանի կարծիքով` հնարավոր է, որ խորհրդարան անցնեն կուսակցություններ, որոնք հանդես կգան որպես ընդդիմություն, սակայն դա զգալիորեն ոչինչ չի փոխի, քանի որ կվերականգնվի Հայաստանի համար դասական «կիսակուսակցական» համակարգը։
