ԵՐԵՎԱՆ, 30 հոկտեմբերի — Sputnik. ՀՀ ԱԺ պետական-իրավական և մարդու իրավունքների պաշտպանության հարցերի մշտական հանձնաժողովն արտահերթ նիստում փակ ընթացակարգով քննարկել է և հավանության է արժանացրել «Էրեբունի-Երևանի հիմնադրման 2800-ամյակի և Հայաստանի առաջին Հանրապետության անկախության հռչակման 100-ամյակի կապակցությամբ քրեական գործերով համաներում հայտարարելու մասին» օրենքի նախագիծը:
Արդարադատության նախարար Արտակ Զեյնալյանն ավելի վաղ հայտարարել էր, որ համաներման նախագիծն ԱԺ կայքում տեղադրելը խախտում է. հանձնաժողովի նախագահ Գևորգ Կոստանյանը, լրագրողների հետ զրույցում անդրադառնալով այս հայտարարությանը, ասել է.
«Չեմ կարող պատասխանել, թե ինչու է տեղադրված ԱԺ կայքում, համենայն դեպս դա անթույլատրելի է համակարգային տեսանկյունից, հրապարակումը հանգեցնում է բազմաթիվ խնդիրների, որոնք չպետք է առաջանան այս հարցի քննարկման ընթացքում»,- շեշտեց նա:
Ավելի վաղ Tert.am-ի հետ զրույցում արդարադատության նախկին նախարար Դավիթ Հարությունյանն ասել էր, որ համաներման նախագծում առկա է լուրջ սխալ, որը վերաբերում է «Սասնա ծռեր» խմբի կողմից ՊՊԾ գնդի գրավմանը ներգրավված այն անձանց, որոնց նկատմամբ չկա դատավճիռ, սակայն կա վնասի փոխհատուցման հարց:
Լրագրողների հարցադրմանը, թե արդյոք Դավիթ Հարությունյանի մատնանշած սխալի հետ համաձայն է, Գևորգ Կոստանյանն ընդգծել է, որ բովանդակային առումով որևէ հարցի չի կարող պատասխանել:
«Սակայն քննարկումների արդյունքում փոփոխություններ հնարավոր է տեղի ունենան»,- շեշտել է նա:
Գևորգ Կոստանյանը նաև չի մեկնաբանել՝ արդյո՞ք նախագիծն աննախադեպ ընդգրկուն է, ինչպես հայտարարում է Կառավարությունը.
«Շրջանակը լայն կամ նեղ լինելու տեսակետից մենք կարող ենք խոսել բովանդակային քննարկումները ավարտելու արդյունքում: Հիմա ես չեմ ուզում դա մեկնաբանել: Առաջին ընթերցման արդյունքում գնահատելու հնարավորություն կունենանք»,- նշեց նա:
Հիշեցնենք, որ վաղը՝ հոկտեմբերի 31-ին, ԱԺ արտահերթ նիստում քննարկվելու է համաներման նախագիծը:
