ԵՐԵՎԱՆ, 28 հոկտեմբերի –Sputnik. Հայաստանում ապրող Վրաստանի քաղաքացիները կատարեցին իրենց ընտրությունը հանուն երկրի «ապագայի»` քվեարկելով Հայաստանում Վրաստանի դեսպանատանը բացված ընտրատեղամասում։
«Մենք ընտանիքով ժամանակավոր բնակվում ենք Հայաստանում։ Այսօր այցելեցինք Հայաստանում Վրաստանի դեսպանատուն և առավոտից կատարեցինք մեր ընտրությունը։ Ի դեպ, ակտիվությունն այդքան էլ բարձր չէր, գուցե այն պատճառով, որ առավոտյան ժամ էր», –Sputnik Արմենիայի թղթակցի հետ զրույցում ասաց Նատալին (անունը փոխված է)։
Նա նշեց, որ ընտրատեղամասում հանգիստ մթնոլորտ էր տիրում, իրեն և իր ընտանիքի անդամներին ընտրացուցակներում արագ գտան։
Ի դեպ, նշենք, որ քվեարկությանը կարող էին մասնակցել Վրաստանի միայն այն քաղաքացիները, որոնք նախապես հաշվառվել էին դեսպանատանը։
«Քվեարկությունը գաղտնի մթնոլորտում է անցել։ Դիտորդների քանակը, այդ թվում՝ անկախ դիտորդներինը, արդար ընտրությունների անցկացման վստահություն էր ներշնչում», – ասաց Նատալին։
Նրա խոսքով` այսօր նա իր ձայնով որոշեց Վրաստանի ապագան առաջիկա 6 տարվա համար։ Նա նաև հույս հայտնեց, որ Վրաստանի քաղաքացիները երկրի սահմանից դուրս կատարել են իրենց ընտրությունը և ընտրել են նրան, ում համարում են սեփական պահանջներին առավել համապատասխան։
«Այսօր ձայնս տվել եմ հանուն Վրաստանի ապագայի, հանուն նրա կայուն զարգացման», – ասում է Նատալին։
Genacvale ռեստորանի շեֆ խոհարար Սոսո Մամուլաշվիլին իր ընտրությունը կատարել չի հասցրել։ Աշխատանքի մեծ ծավալի պատճառով նրան այդպես էլ չի հաջողվել գնալ դեսպանատուն քվեարկությանը մասնակցելու համար։
Քեթին (անունը փոխված է) Վրաստանի քաղաքացի է, երկու տարի է ինչ ապրում է Հայաստանում։ Այստեղ է եկել սովորելու։ Նա նույնպես քվեարկելու ցանկություն է ունեցել, սակայն չգիտեր, որ նախապես էր պետք հաշվառվել։
«Ընտանիքիս անդամները Թբիլիսիում կատարել են իրենց ընտրությունը Վրաստանի ապագայի համար, ես նույնպես ուզում էի, սակայն չհասցրեցի գրանցվել», – ասաց նա։
20:00-ի դրությամբ Հայաստանում Վրաստանի դեսպանատան ընտրատեղամասը փակվեց։ Ինչպես Sputnik Արմենիայի թղթակցի հետ զրույցում ասաց ընտրական հանձնաժողովի անդամ Նինո Սպանդերաշվիլին ընտրությունները հանգիստ մթնոլորտում անցան, խախտումներ չեն գրանցվել։ Դիվանագիտական կորպուսի ներկայացուցիչները, ինչպես նաև Հայաստանում Վրաստանի դեսպան Գեորգի Սագանելիձեն նույնպես կատարել են իրենց ընտրությունը։
Հիշեցնենք, որ Վրաստանում հերթական նախագահական ընտրություններն անցկացվում են այսօր։ Դրանք նախագահի վերջին ուղիղ ընտրություններն են։ Զուրաբիշվիլիից բացի նախագահի պաշտոնի համար մրցում են Վրաստանի խորհրդարանի խոսնակ «Վրաստանի լեյբորիստական կուսակցության առաջնորդ» Շալվա Նաթելաշվիլին, «Գիրչի» ընդդիմադիր կուսակցության առաջնորդ Զուրաբ Ջափարիձեն, «Վրացական մարշ» շարժման առաջնորդ Սանդրո Բրեգաձեն, Վրաստանի խորհրդարանի նախկին նախագահ Դավիթ Ուսուպաշվիլին, գործող նախագահ Գեորգի Մարգվելաշվիլին։
