ԵՐԵՎԱՆ, 28 հոկտեմբերի –Sputnik, Աշոտ Սաֆարյան. Հայաստանի իշխանությունները պետք է ավելի կտրուկ և կոնկրետ արձագանքեն Երևանում`ԱՄՆ նախագահի խորհրդականի կողմից արված հայտարարություններին։ Այս մասին Sputnik Արմենիայի թղթակցի հետ զրույցում ասաց Դեմոկրատական կուսակցության նախագահ Արամ Սարգսյանը։
Նրա խոսքով` ԵԱՀԿ ՄԽ համանախագահ երկրի ներկայացուցիչն իրավունք չունի միջամտելու Հայաստանի ներքաղաքական գործընթացներին։ Ջոն Բոլթոնի արտահայտություններն այն մասին, որ Նիկոլ Փաշինյանի հավանական հաղթանակն ընտրություններին հնարավորություն կտա վճռական քայլեր կատարելու կարգավորման ուղղությամբ, ուղղակի միջամտություն է ինքնիշխան պետության ներքին հարցերի մեջ։
«Պատկերացնում եք, թե ինչ հիստերիա կառաջանար մեր «արևմտամետ փորձագետների» մոտ, եթե ռուսական պաշտոնական այրերից որևէ մեկը նման արտահայտություններ թույլ տար։ Բոլթոնն, ըստ էության, որոշում է, թե ում հետ մենք բարեկամություն անենք, ում հետ` ոչ։ Անհեթեթ է», – ասում է Սարգսյանը։
Բացի այդ, ինչպես նա կարծում է, Դոնալդ Թրամփի խորհրդականն ուղղակիորեն Փաշինյանին դրդում է Արցախի հարցով տարածում չունեցող լուծումների։ Բոլթոնի հայտարարությունները նման են հեռացող դեսպան Ռիչարդ Միլսի` Ադրբեջանին տարածքային զիջումների անհրաժեշտության մասին պնդումներին։
«Հայաստանի իշխանություններն ու ԱԳՆ-ն, ցավոք, պատշաճ կերպով չեն արձագանքել», – դժգոհություն հայտնեց քաղաքական գործիչը։
Փաշինյանի հայտարարությունն այն մասին, թե «Բոլթոնը չի կարող խոսել իմ անունից» ակնհայտորեն բավարար չէ։ Հստակ դիվանագիտական պատասխան է պետք տալ։ Դրա համար պաշտոնական Երևանը պետք է հակամարտության կարգավորման սեփական դոկտրինան ունենա։
«Երբ դու չես պատասխանում, դա ընկալվում է որպես համաձայնություն իրենց պահանջներին և կոչերին։ Հետևաբար, ՀՀ ԱԳՆ–ն պետք է ոչ երկիմաստ հայտարարի, որ Ադրբեջանին որևէ զիջումներ չի անելու, եթե նրանք հրաժարվում են խաղաղ պայմանագրից։ «Մադրիդյան սկզբունքները» չափազանց վտանգավոր են Հայաստանի համար, ինչի մասին հայտարարում ենք երկար տարիներ», – ասաց Սարգսյանը։
Նա անհրաժեշտ է համարում, վերջապես, կողմնորոշվել, թե ինչ է ուզում հայկական կողմը, ինչ խնդիրներ է դնում իր առջև։ Հայկական դիվանագիտության արդյունավետությունը, մեր զրուցակցի կարծիքով, որոշակի առումով նաև կոլեկտիվ պատասխանատվություն է ենթադրում։ Ամենևին էլ պարտադիր չէ, որ Նիկոլ Փաշինյանը միայնակ իր ուսերին վերցնի կարգավորման ողջ բեռը։ Սարգսյանը կոչ է անում վարչապետի պաշտոնակատարին հրաժարվել «սուպերվարչապետական» համակարգից և լիազորությունների մի մասը փոխանցել ՀՀ նախագահ Արմեն Սարգսյանին։ Նախագահը փորձառու գործիչ է, պրոֆեսիոնալ դիվանագետ և ավելի լավ է տիրապետում խնդրի բոլոր նրբություններին։
Կրկին վերադառնալով Ռուսաստանի հետ հարաբերությունների թեմային՝ Դեմոկրատական կուսակցության առաջնորդը Բոլթոնի հայտարարություններում վտանգ է նկատել կապված հայ–ռուսական համագործակցության հետ։
Երևանում ԱՄՆ նախագահի խորհրդականը հայտարարեց, որ Հայաստանը ռուսական զենքը կարող էր ամերիկյանով փոխարինել, և որ այն պետք է ինքնուրույն և անկախ դառնա իր արտաքին քաղաքականության հարցում։
Կուսակցության առաջնորդը դա գնահատում է որպես Մոսկվայի հետ հարաբերությունները վերանայելու ուղիղ կոչ։ Հայաստանը, նրա համոզմամբ, չպետք է թույլ տա, որ որևէ մեկը հարցականի տակ դնի Ռուսաստանի հետ ռազմավարական դաշնակցությունը։
