ԵՐԵՎԱՆ, 23 հոկտեմբերի — Sputnik. ԱԺ «Ելք» խմբակցության պատգամավոր Ալեն Սիմոնյանը կարծում է, որ ՀՀԿ խմբակցությունը վաղը` հոկտեմբերի 24-ին, Նիկոլ Փաշինյանին ընտրելու փորձ չի անի: Այս մասին նա հայտնեց ԱԺ-ում լրագրողների հետ զրույցում` միաժամանակ հավելելով, որ եթե «Հանրապետականը» նման որոշում կայացնի, այդ պարագայում չի կարողանա անհրաժեշտ ձայներ հավաքել:
«Ես վստահ չեմ, որ կկարողանան անհրաժեշտ ձայներն ապահովել, ես դա համարում եմ ոչ խելամիտ քայլ, որովհետև դա խելագարության կանխավարկած է»,-ասաց նա` ավելացնելով, որ բոլորն էլ գիտեն, թե վարչապետի ընտրության ձևական գործընթացն արվում է միայն մի նպատակով, որ 2 անգամ վարչապետ չընտրվի, և խորհրդարանը ցրվի:
ՀՅԴ խմբակցության ղեկավար Արմեն Ռուստամյանն էլ ասաց, որ այդ ամենն արվում է, որպեսզի ԱԺ-ն լուծարվի իրավունքի ուժով և ոչ թե ուժի իրավունքով:
«Երևի կամաց-կամաց հասկանում են, որ Սահմանադրության տառն ու ոգին պետք է հարգեն ու դրա համար ստիպված գնում են այս քայլին»,- մեկնաբանելով վարչապետի պաշտոնում Նիկոլ Փաշինյանին առաջադրելու «Ելքի» որոշումը, ասաց Ռուստամյանը:
Թե ինչպես կվարվի վաղվա ընտրությանը ՀՅԴ-ն, Ռուստամյանի խոսքով, խմբակցությունը դեռ որոշում չի կայացրել:
«Գոնե մի ուրիշին առաջադրեին, որ չքվեարկելը հեշտ լիներ: Նիկոլ Փաշինյանին չքվեարկելը նորից կարող է ժողովրդի մի զգալի մասի մոտ առաջացնել այն տպավորությունը, որ մենք հակահեղափոխական ենք, սև ուժ ենք: Այնպիսի մթնոլորտ են ստեղծել, որ մարդ չգիտի` ինչ անի, որն է ճիշտ»,- ասաց նա:
Իսկ խմբակցության վերջնական որոշումը Ռուստամյանը խոստացավ հայտարարել վաղվա հատուկ նիստում:
«Ծառուկյան» խմբակցության պատգամավոր Նաիրա Զոհրաբյանը լրագրողների հետ զրույցում հավաստիացրեց` իրենց խմբակցությունը Փաշինյանի օգտին չի քվեարկի: «Ես կարծում եմ` դա ֆորմալ առաջադրում է: Բնականաբար, ինչպես «Ելքի» մեր գործընկերները, մենք էլ չենք քվեարկի և թույլ կտանք, որ վարչապետը երկու անգամ չընտրվի, խորհրդարանը լուծարվի, ու մենք գնանք խորհրդարանական արտահերթ ընտրության»,- ասաց Զոհրաբյանը` հավելելով, որ ԲՀԿ-ն հավատարիմ կմնա ստորագրած հուշագրին:
Հիշեցնենք` ԱԺ «Ելք» խմբակցությունը վարչապետի պաշտոնում այսօր առաջադրել է Նիկոլ Փաշինյանի թեկնածությունը: Այս պահին Փաշինյանը միակ առաջադրված թեկնածուն է: «Ելքը» միաժամանակ նաև կոչ է արել չընտրել Փաշինյանին: Հիշեցնենք` վաղը` հոկտեմբերի 24-ին, Ազգային ժողովը հատուկ նիստ կգումարի` ՀՀ վարչապետի ընտրության հարցով:
ԱԺ արտահերթ ընտրությունները վարչապետի պաշտոնակատար Նիկոլ Փաշինյանի նախաձեռնությամբ կկայանան դեկտեմբերի կեսին, եթե խորհրդարանը 2 անգամ անընդմեջ 2 շաբաթվա ընթացքում վարչապետ չընտրի: Այդ նպատակով Նիկոլ Փաշինյանը հոկտեմբերի 16-ին հրաժարական էր ներկայացրել: Վարչապետի ընտրության հարցով հատուկ նիստը կգումարվի վաղը` հոկտեմբերի 24-ին: Նիստի ժամը դեռ պաշտոնապես չի հայտարարվում: Վաղվա հատուկ նիստում վարչապետ չընտրելու դեպքում Ազգային ժողովը-ը ևս մեկ նիստ կգումարի 7 օր անց, որից հետո օրենքի ուժով խորհրդարանը կցրվի և կնշանակվեն ԱԺ արտահերթ ընտրություններ:
