ԵՐԵՎԱՆ, 23 հոկտեմբերի — Sputnik. Հայաստանի Գեղարքունիքի և Ռուսաստանի Սարատովի մարզերը մտադիր են խորացնել գործակցությունը։ Կողմերը համապատասխան համաձայնագիր կստորագրեն 2019թ-ին Սարատովում։
Այս մասին Sputnik Արմենիա մուլտիմեդիոն մամուլի կենտրոնում ասաց Սարատովի շրջանի կառավարության ղեկավարի առաջին տեղակալ Վադիմ Օյկինը։
Սարատովի շրջանի պատվիրակությունը Երևան է եկել «Եվրասիական շաբաթ 2018» միջազգային համաժողովին մասնակցելու համար։
«Ռուսաստանի և Հայաստանի հարաբերությունները սրընթաց զարգանում են, առանցքային դեր են խաղում մարզերը։ ԵԱՏՄ համաժողովի երկրների հետ ապրանքաշրջանառությունը 2018թ-ին կազմել է մոտ 124 միլիոն դոլար, Հայաստանի հետ` 4 միլիոն դոլար», — ասաց Օյկինը։
2017թ-ի համեմատ այդ ցուցանիշն ավելացել է երկու անգամ։ Երևանում համաժողովի առաջին օրը սարատովցի գործարարները Երևանում արդեն հասցրել են համագործակցության մասին մի շարք համաձայնագրեր կնքել։
Մասնավորապես, խոսքը վերաբերում է Սարատովից Հայաստան սննդի արդյունաբերության, լեռնահանքային արդյունաբերության համար սարքավորումների առաքումներին։
Նա նշեց, որ Սարատովի մարզում ապրում են ավելի քան 80 ազգության մարդիկ, այդ թվում` հայեր։ Հայկական համայնքն ակտիվ է երկրի քաղաքական, մշակութային, հասարակական կյանքում և գործարար ոլորտում։ Այստեղ գործում են նաև կիրակնօրյա դպրոցներ, որտեղ ուսումնասիրում են լեզուն, ավանդույթները։
2019թ-ին մարզում կբացվի միջազգային օդանավակայան, որը թույլ կտա ուղիղ կապ հաստատել Սարատովի և Երևանի միջև։
Սարատովի մարզը Հայաստանին կարող է նաև առաջարկել իր հարստագույն հումքային բազան։ Սարատովի մարզից Հայաստան են առաքում թռչնամիս, սև մետաղ, թառափ, փայլաթիթեղ։
«Ձևավորվել է աշխատանքային խումբ, որը կաշխատի համաձայնագրի իրագործման ուղղությամբ», — ասաց Օյկինը։
Հայաստանի առևտրաարդյունաբերական պալատի նախագահի խորհրդական Լիլյա Գևորգյանը Sputnik Արմենիա մուլտիմեդիոն մամուլի կենտրոնում նշեց, որ Հայաստանի և Սարատովի մարզի միջև կա չիրագործված ներուժ։
Հայաստանը կարող է հետաքրքիր լինել իր գինու-օղու արդյունաբերությամբ, ոսկերչությամբ, ՏՏ-ով և այլն։
