ԵՐԵՎԱՆ, 20 հոկտեմբերի — Sputnik. Մոսկվայի քննչական կոմիտեն հրաժարվել է քրեական գործ հարուցել Արմեն Ջիգարխանյանի նախկին կնոջ` Վիտալինա Ցիմբալյուկ-Ռոմանովսկայայի դեմ «հանցակազմի բացակայության պատճառով »։ Այս մասին հայտնել է «Կոմսոմոլսկայա պրավդան»։
«Մենք արդեն երեք անգամ կարողացել ենք ապացուցել հանցակազմի բացակայությունը Վիտալինայի գործողություններում։ Նա ոչ մի բան չի գողացել նախկին ամուսնուց։ Եվ հիմա բոլոր ունեցվածքային հարցերը մենք կլուծենք քաղաքացիական, այլ ոչ թե քրեական կարգով», — ասել է Վիտալինայի փաստաբան Լարիսա Շիրոկովան։
Վիտալինան և նրա պաշտպանը չեն պատրաստվում անուշադրության մատնել Ցիմբալինա-Ռոմանովսկայայի հասցեին հրապարակային մեղադրանքները և ծրագրում են հայց ներկայացնել զրպարտանքի համար։
83 տարեկան դերասան Արմեն Ջիգարխանյանի և նրա 40 տարեկան կնոջ` Վիտալինա Ցիմբալյուկ-Ռոմանովսկայայի մասին սկսեցին խոսել 2017 թվականի հոկտեմբերի առաջին տասնօրյակում, երբ դերասանը հայտնվեց հիվանդանոցում և հայտարարեց, որ պատրաստ չէ ներել իրեն ցավ պատճառած կնոջը։
Ավելի վաղ Ցիմբալյուկ-Ռոմանովսկայան, որ Ջիգարխանյանի ղեկավարած թատրոնի տնօրենն էր, սեփական ցանկությամբ հեռացել էր թատրոնից և հայտարարել, որ ցանկանում է ամուսնալուծվել։ Դրանից հետո Ջիգարխանյանը պաշտոնական նամակ էր ուղղել Մոսկվայի մշակույթի դեպարտամենտ` իրեն և թատրոնի արտիստներին «կոլեկտիվի նորմալ աշխատանքին խանգարող խաբեբաներից» պաշտպանելու խնդրանքով։ 2017 թվականի հոկտեմբերի վերջին Արմեն Ջիգարխանյանի ղեկավարած թատրոնում հետաքննչական գործողություններ անցկացվեցին դերասանի կորցրած անձնագրի վերաբերյալ քրեական գործով։ Տեղեկացվեց նաև, որ խուզարկություն է անցկացվել Ցիմբալյուկ-Ռոմանովսկայայի բնակարանում, առգրավվել են արտասահմանյան անձնագիրը, բժշկական փաստաթղթերն ու Ջիգարխանյանի կտակը։ Նրանք պաշտոնապես ամուսնալուծվեցին նոյեմբերի 27-ին։
