ԵՐԵՎԱՆ, 18 հոկտեմբերի — Sputnik. ԱԺ առաջիկա ընտրությունների հիմնական առեղծվածային պահն այն է, թե ով է երկրորդ տեղում լինելու Նիկոլ Փաշինյանի քաղաքական ուժից հետո։ Ընտրություններին երկու ամսից քիչ ժամանակ է մնացել, բայց քաղաքական ուժերն առանձնապես ակտիվություն չեն դրսևորում։ Այս մասին այսօր մամուլի ասուլիսի ժամանակ ասաց քաղտեխնոլոգ Արմեն Բադալյանը։
Նրա խոսքով` օրինակ, նախկին իշխող կուսակցությունը, որը հինգ-վեց ամիս առաջ երկրում բացարձակ իշխանություն ուներ, նույնիսկ չի կողմնորոշվել` մասնակցելու է ընտրություններին, թե ոչ, իսկ կուսակցության առաջնորդն այս ամիսների ընթացքում բառ անգամ չի ասել։
«Հանրապետականներն այս ամիսների ընթացքում իրենց դիրքը փոքր-ինչ ամրացնելու, ռեմբրենդինգ անելու ու հասարակությանը քաղաքական նոր կերպարանքով ներկայանալու հնարավորություն ունեին։ Բայց նրանք բաց թողեցին այդ հնարավորությունը, ու հիմա խորհրդարանում հայտնվելու հավանականությունը չնչին է։ Ավելին` եթե Սերժ Սարգսյանը շարունակի ղեկավարել կուսակցությունը, ապա կասկածում եմ, որ այդ քաղաքական ուժն ընդհանրապես պատգամավորական մանդատ ստանա», — ասաց Բադալյանը։
Եթե ընթացիկ իրավիճակից ելնելով խորհրդարանի ապագա կառուցվածքի վերաբերյալ կանխատեսումներ անենք, ապա, քաղաքագետի խոսքով, «Իմ քայլը» դաշինքից հետո երկրորդ տեղում կլինի Գագիկ Ծառուկյանի «Բարգավաճ Հայաստանը»։ Կուսակցությունը դեռ որոշակի ընտրազանգված ունի մարզերում։
Բադալյանի խոսքով` երկրորդ տեղում կլինի կա՛մ «Լույս» դաշինքը` Փաշինյանին նախկին համախոհները, կա՛մ «Սասնա ծռեր» կուսակցությունը։
Հիշեցնենք` Նիկոլ Փաշինյանը հոկտեմբերի 16-ին հրաժարվեց վարչապետի պաշտոնից դեկտեմբերին կայանալիք ԱԺ արտահերթ ընտրությունների անցկացման համար։
