ԵՐԵՎԱՆ, 17 հոկտեմբերի — Sputnik. Հայաստանը բարելավել է իր դիրքերը Գլոբալ մրցունակության ինդեքսում` հրապարակված Համաշխարհային տնտեսական ֆորումի (ՀՏՖ) կողմից։
2017-2018թթ–ի վարկանիշում 137 երկրների շարքում այն բարձրացել է 73–րդ տեղը, մեկ տարի առաջ Հայաստանը զբաղեցնում էր 79–րդ հորիզոնականը։
Ինչպես նշեց Sputnik Արմենիայի թղթակցի հետ զրույցում տնտեսական գիտությունների դոկտոր, Ռուս–հայկական համալսարանի տնտեսության և ֆինանսների ամբիոնի վարիչ Մարիամ Ոսկանյանը, ինդեքսում Հայաստանի տեղի փոփոխությունն այնքան լուրջ չէ` արմատական բարելավումների մասին խոսելու համար։
«Բացի այդ, չպետք է մոռանալ, որ մրցունակության ինդեքսը ներառում է բավական շատ որակական բնութագրեր, որոնք անխուսափելիորեն ունեն սուբյեկտիվության որոշակի բաժին։ Ինդեքսն ամեն տարի հաշվարկվում է ըստ բոլոր երկրների, ուստի մեր վարկանիշի բարձրացումը կարող է ընդամենը նշանակել մյուս երկրներում ինչ–որ ցուցանիշների վատացում և նրանց վարկանիշի անկում», – ասաց Ոսկանյանը։
Նրա կարծիքով` բարելավման միակ ցուցանիշը բնակչության բարեկեցության մակարդակի որակական փոփոխությունն է (բարձրացումը)։
Դրան հասնելու համար ոչ միայն ժամանակ է պետք, այլ նաև կառուցվածքային, որակական, ինստիտուցիոնալ բարեփոխումներ, որոնք հնարավոր չէ անցկացնել կարճատև հեռանկարում։
«Այնպես որ՝ ինդեքսում մեր դիրքերի բարելավումը, իհարկե, ուրախացնում է, բայց ինձ թվում է, որ մենք դեռ շատ պետք է աշխատենք, որպեսզի կարողանանք խոսել իսկական տնտեսական հաջողության մասին», – նշեց Ոսկանյանը։
Ըստ մեկ այլ տնտեսագետի՝ Թաթուլ Մանասերյանի՝ շատերը նշում են, որ «թավշյա հեղափոխությունից» հետո Հայաստանում նկատվում են դրական փոփոխություններ։
«Բայց ես կհավելեի, որ վերջին տարիներին նույնպես ինստիտուցիոնալ առումով արձանագրվել է որոշակի առաջընթաց, և դա նույնպես հնարավորություն է տվել Հայաստանին զգալիորեն բարելավել իր դիրքերը», – նշեց Մանասերյանը։
Գլոբալ մրցունակության ինդեքսը չափում է չորրորդ արդյունաբերական հեղափոխությանը երկրների պատրաստվածությունը։ Այն հաշվի է առնում ինստիտուտների որակը, ենթակառուցվածքի վիճակը, ՏՏ և ժամանակակից հաղորդակցությունների ներթափանցումը, մակրոտնտեսական կայունությունը, սպառողական շուկան, աշխատաշուկան, ֆինանսական շուկան, ներքին շուկայի չափը, կրթությունը և հմտությունները, բիզնես զարգացման դինամիկան և այլն։
