ԵՐԵՎԱՆ, 16 հոկտեմբերի – Sputnik. Գաղափարներ ունենալը լավ է, բայց դրանք կյանքի կոչելն ավելի լավ է։ Հենց դա է ուզում հայ ծրագրավորողներին սովորեցնել G2iA ֆրանսիական քոնսալթինգային ընկերությունը։
«Մենք ստարտափերի զարգացման համար ռեսուրսներ ենք գտնում, այդ թվում` խորհրդատուներ և ներդրողներ։ Բայց գլխավորը` մենք ցույց ենք տալիս` ինչ անել, որպեսզի ներդրողը ցանկանա մեզ հետ համագործակցել», – Sputnik Արմենիայի թղթակցի հետ զրույցում նշեց ընկերության տնօրեն Ֆիլիպ Պուն։
«Դուք գաղափար ունե՞ք։ Հիանալի է։ Իսկ ինչպե՞ս դա դարձնել աշխատող բիզնես։ Պետք է սա հասկանալ և հասկացնել ուրիշներին», – հավելեց նա։
Դրա համար սկսնակ թիմերին օգնում են կազմել բիզնես մոդել։ Հետո նրանք կապ են հաստատում խորհրդատուների (մենտոր) հետ` ըստ ոլորտների` ինժեներներ, դեղագործներ, ծրագրավորողներ։ Նրանք սովորեցնում են «միանգամից մի ձեռքով երկու ձմերուկ բռնել»` մտածել և՛ տեխնոլոգիայի, և՛ շուկայի մասին։
Դրա համար գլխավորը հասկանալն է, թե ինչ եք ուզում անել։
«Օրինակ` անցած տարի ես դիտում էի մի թիմի նախագիծ։ Նրանք արդեն ցույց էին տվել յոթերորդ սլայդը, իսկ ես դեռ չէի կարողանում հասկանալ, թե նրանք կոնկրետ ինչ են անում։ Խորհրդատուն օգնում է նրանց գաղափարներն իրականություն դարձնել», – ասաց նա։
Երբ ստարտափերը կատարում են այդ «տնային աշխատանքը», նրանց համար կապեր են բացվում վենչուրային հիմնադրամների հետ թե՛ Ֆրանսիայում, թե՛ աշխարհի այլ երկրներում։
Հիմա ֆրանսիացիներն աշխատում են արդեն 15 հայկական ստարտափի հետ և ոչ միայն ՏՏ ոլորտում, այլ նաև բիոտեխնոլոգիաների և ինժեներիայի։
