ԵՐԵՎԱՆ, 11 հոկտեմբերի – Sputnik. Հազարավոր հայեր ամրապնդել են Ֆրանսիան և պաշտպանել այն, ինչպես սեփական երկիրը:
Այդ մասին ասաց Ֆրանսիայի նախագահ Էմանուել Մակրոնը Ֆրանկոֆոնիայի միջազգային կազմակերպության գագաթնաժողովի ժամանակ:
Նա շնորհակալություն հայտնեց հայկական կողմին միջոցառումները բարձր մակարդակով կազմակերպելու և ջերմ ընդունելության համար: Ֆրանսիան պատասխանում է Հայաստանին նույնպիսի սիրով: Բավական է ասել «Հայաստան», և Փարիզում, Լիոնում, Մարսելում և տասնյակ այլ քաղաքներում մարդկանց մոտ արթնանում են ամենաջերմ զգացմունքներ, հավելեց նա:
Ֆրանսիայի համար Հայաստանը միայն բազմադարյա մշակույթ և պատմություն չէ: Դա նաև հազարավոր հայերն են, որոնք ժամանել են այստեղ իրենց ժողովրդի մեծ ողբերգությունից հետո: Նրանք Ֆրանսիային նվիրել են բազմաթիվ արտիստներ, գիտնականներ, մարզիկներ: «Շատ հայեր պաշտպանել են մեզ զենքը ձեռքին՝ ինչպես իրենց հայրենի երկիրը», — ասաց Մակրոնը:
Այս օրերին, նշեց նա, չի կարելի չհիշել Շառլ Ազնավուրին, որին սիրում են Ֆրանկոֆոնիայի 84 երկրներում և դրանց սահմաններից դուրս:
«Նա երգիչ է, որը ներկայացրել է ֆրանսիական մշակույթն ամբողջ աշխարհում: Նա երբեք չի մոռացել նաև իր ժողովրդի մասին: Նա օգնել է Հայաստանին երկրաշարժի օրերին, ամեն ինչ արել իր ժողովրդի համար, որը հայտնվել էր արյան և փլատակների մեջ: Իսկ մինչ այդ նա պաշտպանել է արդարությունը, պաշտպանել Հայոց ցեղասպանության զոհերի հիշատակը», — հավելեց Ֆրանսիայի նախագահը:
«Այսօր Հայաստանում հավաքվել է երկրների ընտանիք ամբողջ մոլորակից, բոլոր հինգ մայրցամաքներից: Ընտանիք, որին շատ բան է միավորում: Մենք տարբեր ակցենտներ ունենք ֆրանսիական արտասանության մեջ, տարբեր մշակույթներ, տարբեր աշխարհընկալումներ: Բայց մենք բոլորս գնում ենք նույն ուղղությամբ: Մենք ունենք խաղաղության, եղբայրության և մարդու իրավունքների պաշտպանության ընդհանուր արժեքներ», — ասաց Մակրոնը:
Ֆրանկոֆոնիայի գագաթնաժողովին ժամանել են 38 երկրների առաջնորդներ, այդ թվում՝ Ֆրանսիայի նախագահ Էմանուել Մակրոնը, Կանադայի և Բելգիայի վարչապետներ Ջասթին Տրյուդոն և Շառլ Միշելը, Լիբանանի նախագահ Միշել Աունը:
