ԵՐԵՎԱՆ, 10 հոկտեմբերի — Sputnik.Կառավարության այսօրվա նիստում գործադիրն անդրադարձավ վաղը Երևանում որոշ փողոցներ փակելու խնդրին։
Ոստիկանապետ Վալերիյ Օսիպյանը զեկուցեց, թե որ փողոցները որ ժամերին են փակվելու, մասնավորապես, ասելով. «Ֆրանկոֆոնիայի 17-րդ գագաթաժողովի շրջանակներում Հանրապետության հրապարակում կայանալիք գալլա-համերգի ընթացքում երթևեկության անվտանգությունն ապահովելու նպատակով՝ հոկտեմբերի 10-ին, ժամը 22:00-ից արգելվելու է տրանսպորտային միջոցների կայանումը՝ Հանրապետության և Շահումյանի հրապարակներում, Վազգեն Սարգսյան փողոցներում, Աբովյան փողոցում՝ Աբովյան-Թումանյան փողոցների խաչմերուկից դեպի Հանրապետության հրապարակ, Նալբանդյան փողոցում՝ Սախարովի հրապարակից դեպի Հանրապետության հրապարակ, Տիգրան Մեծի պողոտայում՝ Տիգրան-Մեծի պողոտա Հանրապետության փողոց խաչմերուկից դեպի Հանրապետության հրապարակ, Ամիրյան փողոցում՝ Ամիրյան փողոց Մաշտոցի պողոտա խաչմերուկից դեպի Հանրապետության հրապարակ:Ֆրանկոֆոնիայի 17-րդ գագաթնաժողովի հյուրերին սպասարկող տրանսպորտային միջոցների երթևեկության անվտանգությունն ապահովելու նպատակով՝ հոկտեմբերի 11-ին, ժամը 8:30-ից մինչև ժամը 10:30 արգելվելու է երթևեկությունը Աճառյան փողոցից դեպի Կենտրոն՝ Մյասնիկյան-Հերացու-Կորյունի փողոցներում, Ազատության պողոտայում՝ Ազատության պողոտա Բաբայան փողոց խաչմերուկից՝ Սարալանջի, Տերյան, Կորյունի փողոցներում:
Ամբողջությամբ՝ երկկողմանի փակ է լինելու Մաշտոցի պողոտան, Աթենքի փողոցը և Ծիծեռնակաբերդի խճուղին:Հոկտեմբերի 11-ին, ժամը 5-ից մինչև միջոցառման ավարտը արգելվելու է երթևեկությունը Վազգեն Սարգսյան փողոցներում, իսկ ժամը 8:30-ից փակ է լինելու Աբովյան փողոցը՝ Աբովյան-Թումանյան փողոցների խաչմերուկից դեպի Հանրապետության հրապարակ, Ամիրյան փողոցը՝ Ամիրյան-Մաշտոց խաչմերուկից դեպի Հանրապետության հրապարակ, Իտալիայի, Բեյրութի և Զաքիյան փողոցները, Խորենացու փողոցը՝ Ագաթանգեղոսի-Խորենացու փողոցների խաչմերուկից դեպի Մաշտոցի պողոտա-Խորենացու փողոց խաչմերուկ, Տիգրան Մեծի պողոտան՝ Տիգրան Մեծի-Խանջյան խաչմերուկից դեպի Հանրապետության հրապարակ, Հանրապետության փողոցը՝ Հանրապետության-Վարդանանց խաչմերուկից դեպի Տիգրան Մեծի պողոտա, Նալբանդյան փողոցը՝ Սախարովի հրապարակից դեպի Հանրապետության հրապարակ, Արամի փողոցը՝ Արամի-Խանջյան խաչմերուկից դեպի Նալբանդյան փողոց»։
Նիկոլ Փաշինյանը քաղաքացիներից ներողություն հայցեց անհարմարության համար ու խորհուրդ տվեց հնարավորության դեպքում խուսափել այդ օրը սեփական ավտոմեքենայով երթևեկելուց։
«Մետրոն աշխատելու է, ավելի լավ կլինի մետրոյից օգտվել։ Ակնկալում ենք, որ մոտրոպոլիտենի ղեկավարությունը կավելացնի նաև շարժակազմերը՝ քաղաքացիների հոսքը պատշաճ ապահովելու համար»,- ասաց Փաշինյանը։
Վարչապետը նաև հիշեցրեց, որ Հանրապետության հրապարակում նախատեսվում է գալլա-համերգ, ու հարց ուղղեց ոստիկանապետին, թե փակ փողոցներով ինչպես են քաղաքացիները հրապարակ հասնելու։ Ապա ինքն էլ առաջարկեց՝ որտեղ փակ է, ոտքով եկեք։
Փաշինյանը ԱԻ նախարար Ֆելիքս Ցոլակյանից նաև հետաքրքրվեց՝ վաղն ինչ եղանակ է սպասվում Երևանում։ Ցոլակյանը հայտնեց, որ սպասվում է առանց տեղումների, տաք եղանակ, երեկոյան 17-19, գիշերը՝ մինչև 12 աստիճան տաքություն։
Հիշեցնենք՝ հոկտեմբերի 11-12 –ին Երևանում կայանալիք Ֆրանկոֆոնիայի գագաթնաժողովին ժամանելու են Ֆրանսիայի նախագահ Էմանուել Մակրոնը, Կանադայի ու Բելգիայի վարչապետներ Ջասթին Տրյուդոն ու Շարլ Միշելը, նաև բարձր մակարդակի պատվիրակություններ աշխարհի տասնյակ երկրներից:
