ԵՐԵՎԱՆ, 9 հոկտեմբերի — Sputnik. Երեքշաբթի Երևանի կենտրոնում` Ազատության հրապարակում, բացվել են մի քանի տասնյակ տաղավարներ, որոնք ներկայացնում են տարբեր երկրների և տարածաշրջանների մշակույթը։ Տեղի է ունեցել Ֆրանկոֆոնիայի ավանի բացումը։
Երևանը Ֆրանկոֆոնիայի օրերին վերածվել է բազմամշակութային կենտրոնի, որտեղ կողք կողքի դրված են հինգ մայրցամաքների ժողովուրդների ավանդույթները և առանձնահատկությունները ներկայացնող վրաններ։
«Մենք հետաքրքիր պատկեր ունենք մշակութային առումով։ Առաջին հերթին կնշեմ հայկական տաղավարի մասին, որտեղ ներկայացված են Հայաստանի մարզերը և Արցախը», – լրագրողների հետ զրույցում ասաց մշակույթի նախարար Լիլիթ Մակունցը։
Նա նշեց, որ հիմնական միջոցառումները թեև տեղի կունենան գագաթնաժողովի մի քանի օրերի ընթացքում, սակայն դրանով գագաթնաժողովը չի ավարտվի։
Բանն այն է, որ 2018թ–ին Հայաստանը երկու տարով ստանձնել է Ֆրանկոֆոնիայի երկրների կազմակերպության նախագահությունը։
«Մենք նախնական պայմանավորվածություն ունենք Հայաստանում Ֆրանսիայի դեսպանատան հետ երկու տարվա ընթացքում ոչ պակաս հետաքրքիր միջոցառումներ անցկացնելու մասին», – ասաց Մակունցը։
Հիշեցնենք՝ հոկտեմբերի 11-12 –ին Երևանում կայանալիք Ֆրանկոֆոնիայի գագաթնաժողովին ժամանելու են Ֆրանսիայի նախագահ Էմանուել Մակրոնը, Կանադայի ու Բելգիայի վարչապետներ Ջասթին Տրյուդոն ու Շարլ Միշելը, նաև բարձր մակարդակի պատվիրակություններ աշխարհի տասնյակ երկրներից:
