ԵՐԵՎԱՆ, 9 հոկտեմբերի — Sputnik. Հայաստանում ԱՄՆ դեսպան Ռիչարդ Միլսը համեմատել է վարչապետ Նիկոլ Փաշինյանին ԱՄՆ երկրորդ նախագահ Ջոն Ադամսի հետ։
Դիվանագետն ավարտում է իր առաքելությունը Երևանում։ Դրա հետ կապված` նա հոկտեմբերի 8–ին հանդիպել է վարչապետի հետ, որին նվիրել է հայտնի ամերիկացի պատմաբան Դևիդ Մաքալոուի գիրքը Ջոն Ադամսի մասին։
Երեքշաբթի ճեպազրույցում Միլսը խոստովանեց, որ Փաշինյանը հիշեցնում է նրան Ադամսին։ ԱՄՆ երկրորդ նախագահն էլ վարչապետի պես առաջնորդում էր մարդկանց, ովքեր ցանկանում էին փոփոխություններ, ժողովրդավարություն տեսնել երկրում։
«Պարոն Ադամսը, լինելով Միացյալ Նահանգների երկրորդ նախագահ, իր ողջ կյանքն ապրեց, որպեսզի ապահովի ժողովրդի կամքի մշտապես լսելի լինելը», – ասաց նա։
Նրա խոսքով` Ամերիկան Ադամսից վերցրել է ճշմարտությունը, որի համաձայն քաղաքական շարժումը պետք է հանգեցնի առաջընթացի։ Եվ մակագրելով Փաշինյանին նվիրած գիրքը` դեսպանը մեջբերել է Ադամսի խոսքերը, որի համաձայն հեղափոխությունը Միացյալ Նահանգներում չի եղել փողոցներում, այլ եղել է մարդկանց մտքում, մարդկանց մեջ, երբ նրանք կարողացել են լսել միմյանց։
