ԵՐԵՎԱՆ, 9 հոկտեմբերի — Sputnik. Ամերիկյան կողմն ուշադիր հետևում է Հայաստանում ընթացող ներքաղաքական գործընթացներին և ուրախ է, որ հոկտեմբերի 2–ի իրադարձությունները խաղաղ ավարտ են ունեցել։ Այդ մասին Երևանում ճեպազրույցի ընթացքում հայտարարեց ԱՄՆ դեսպան Ռիչարդ Միլսը։
«Մենք հետևում ենք Հայաստանում ներքին զարգացումներին։ Մենք ուրախ ենք, որ հոկտեմբերի 2–ին ստեղծված իրավիճակը հաջողվել է լուծել խաղաղ միջոցներով», – նշեց դեսպանը` մեկնաբանելով վարչապետի կողմնակիցների ցույցը խորհրդարանի շենքի մոտ։
Դիվանագետի համոզմամբ` արտահերթ ընտրությունների ամսաթիվը պետք է որոշեն ժողովուրդը, կառավարությունը և կուսակցությունները։
«ԱՄՆ–ը, իր հերթին, շահագրգռված է նրանում, որ ընտրությունները լինեն արդար և ազնիվ, որպեսզի դրանց նկատմամբ վստահություն լինի», – հայտարարեց նա։
Դեսպանը կարծում է, որ արտախորհրդարանական ուժերի ակտիվ մասնակցությունը խորհրդարանական ընտրություններին թույլ կտա ապահովել բազմակարծություն։
Բանակցությունների ընթացքում պարզ է դարձել, որ կողմերը պատրաստ են գնալ փոխզիջումների և հասնել կայունության, ընդգծեց դեսպանը։
