ԵՐԵՎԱՆ, 6 հոկտեմբերի — Sputnik. 1964թ-ին, երբ Շառլ Ազնավուրն առաջին անգամ համերգային ծրագրով Հայաստանում էր, համերգի ավարտին, բացելով հանդերձարանի դուռը, այնտեղ հայտնաբերել է, 23 տարեկան մի աղջկա, որը վախվորած ու տագնապած աչքերով նայել է արտիստին: Տարիներ անց Ազնավուրի երկրպագու աղջիկն ինքը բեմ բարձրացավ ու հայտնի դարձավ իր դերասանական խաղով ու ասմունքի արվեստով՝ որպես Սուսաննա Գաբրիելյան:
«Մայրս, բնականաբար, ներկա էր այդ համերգին, նրա մտքով հերթական չարաճճիությունն էր անցել։ Դուրս է եկել դահլիճից և ինչ-որ ճանապարհով սողոսկել Ազնավուրի հանդերձարան: 5-10 րոպե հետո հասկացել է, որ դա կարող է սխալ ընկալվել և վախեցած ու տագնապած փորձել է թաքնվել կահույքի հետևում, բայց այդ պահին ներս է մտել Շառլը»,- 54 տարի առաջ պատահած այդ դիպվածի մասին Sputnik Արմենիային պատմեց դերասանուհու դուստրը՝ բեմադրիչ Մարիամ Գաբրիելյանը:
Շառլ Ազնավուրը մտերմաբար գրկել է վախվորած երկրպագուհուն, մի քանի րոպե զրուցել նրա հետ, ապա հրաժեշտ են տվել միմյանց:
Այս հանդիպումից հետո Ազնավուրի արվեստը դարձել է Սուսաննա Գաբրիելյանի կյանքի անբաժանելի հատվածը:
«Մեր տանը միշտ հնչում էր Շառլի երաժշտությունը, մայրս, տիրապետելով ֆրանսերենին, Ազնավուրին նվիրված բազում հարադրումներ է պատրաստել ռադիոյով ու հեռուստատեսությամբ»,- ասաց Մարիամ Գաբրիելյանը
Աշխարհահռչակ երգչի հետ առաջին հանդիպումից 12 տարի անց դերասանուհու ու մաեստրոյի երկրորդ հանդիպումը տեղի ունեցավ արդեն Ֆրանսիայում՝ 1972թ-ին, երբ Սուսաննա Գաբրիելյանն առաջին անգամ հյուրախաղերի էր մեկնել ԽՍՀՄ սահմաններից դուրս:
«Փարիզում մամային մոտեցել է Ժան Տեր-Մերկերյանը՝ մեր անվանի ջութակահարը, հարցրել է, թե վաղն ինչ է անում։ Մայրս ասել է, որ ամբողջ խմբով պիտի մեկնեն Վերսալ՝ էքսկուրսիայի: Ժանն առաջարկել է առավոտյան 10-15 րոպե շուտ դուրս գալ հյուրանոցից ու ասել է, որ մեծ անակնկալ է սպասում: Ինձ թվում է՝ մայրս ենթադրում էր՝ ինչ անակնկալ պետք է լինի և հենց այդ պատճառով էլ հրաժարվել է մեկնել Վերսալ»,- պատմում է դուստրը:
Սուսաննա Գաբրիելյանին ուղեկցել են Շառլ Ազնավուրի փարիզյան բնակարան, որտեղ հանդիպել, ծանոթացել է Ազնավուրի հոր հետ, միասին նվագել են ու երգել: Դերասանուհին Ազնավուրին հիշեցրել է 12 տարի առաջ Երևանում տեղի ունեցած հանդիպման մասին:
«Շառլը նորից գրկել է մորս ու ասել՝ ահա, թե որտեղից եմ ես հիշում այս հիասքանչ աչքերը»,- ասում է Սուսաննայի դուստրը:
Այս երջանիկ ուղևորությունը, սակայն, խորհրդահայ դերասանուհու համար դարձել է առաջին ու վերջին արտասահմանյան հյուրախաղը:
Խորհրդային երկաթե վարագույրը հավերժ փակվել է նրա համար: Համերգների աշխարհագրությունն այդ դեպքից հետ սահմանափակվել է միայն ԽՍՀՄ տարածքով:
Սուսաննա Գաբրիելյանը մահացել է 1992 թվականին։
