Լաուրա Սարգսյան, Sputnik Արմենիա
Կանանց և տղամարդկանց համար նախատեսված առանձին մասնագիտություններ չկան, հատկապես, երբ մարդը ստիպված է մի կտոր հացի մասին մտածել կամ պարտքեր ունի։ Հենց կենցաղային խնդիրներն են պատճառ դարձել, որ մեր հերոսուհին տաքսի վարի։
Աննան 2008 թվականից աշխատում է բանկային ոլորտում, միայնակ է դաստիարակում 11 տարեկան որդուն։ Սկսել է տաքսու վարորդ աշխատել ֆինանսական լուրջ խնդիրների պատճառով։ Առավոտյան Աննան շտապում է բանկ, աշխատում է հաճախորդների հետ, իսկ երեկոյան իր մեքենայով տուն է տանում նրանց։
«Սա իմ հիմնական աշխատանքը չէ։ Պարզապես որոշեցի, որ ֆինանսական ճգնաժամը հաղթահարելու լավագույն ձևը տաքսի վարելն է։ Առավել ևս, որ անհրաժեշտ հմտություններ և մեքենա ունեմ։ Ստաժավոր վարորդ եմ», — խոստովանում է նա Sputnik Արմենիայի թղթակցի հետ զրույցում։
Աննան գրանցվել է առցանց տաքսի ծառայություններից մեկում, քննություն է հանձնել և անցել է աշխատանքի։
Առաջին պատվերների ժամանակ շատ է հուզվել, վախեցել է շփոթել փողոցները, քանի որ Երևանում շատ են փոքր նրբանցքները։ Բայց ամենից շատ վախեցել է հաճախորդների արձագանքից. ինչպես նրան կընկալեն կողքինները, հատկապես` տղամարդիկ։
«Առաջին մի քանի պատվերներին վախենալով էի գնում, բայց արդյունքը գերազանցեց սպասումները», — ասում է Աննան։
Խոստովանում է, որ շատ է հոգնում երկու տեղ աշխատելով, բայց ուղևորներից ստացած դրական հույզերը էներգիա են հաղորդում, ինչը բավականացնում է, որպեսզի ամեն օր ուրախությամբ շրջի քաղաքի փողոցներով։
«Երբեմն նայում եմ ժամացույցին, զարմանում եմ` որքան արագ անցավ ժամանակը։ Վաղուց տանը պետք է լինեի, բայց դեռ աշխատում եմ», — ասում է Աննան։
Համարում է, որ հաջողության գաղտնիքը հենց իր մեջ է. այն դրական էներգիան, որ փոխանցում է մարդկանց, իրեն է վերադառնում բազմապատկված։
«Զվարճալի դեպքեր» շարքից
Երբեմն զավեշտալի դեպքեր են լինում, որոնք հիմնականում կապված են տղամարդկանց հետ, քանի որ շատերը չեն սպասում, որ իրենց պատվերին կին է արձագանքելու։
Սկզբում զարմանում են, հետո երկար ժամանակ փորձում եմ գոնե մի բառ արտաբերել, վերջում չեն դիմանում և հարցնում են. «Բա ինչի՞ ես տաքսի քշում»։
«Մի անգամ կանգնած էի Արշակունյաց և Գրիգոր Լուսավորիչ փողոցների խաչմերուկում և պետք է շրջադարձ կատարեի Լուսավորիչ փողոց։ Այդ մի քանի վայրկյանի ընթացքում պատվեր ստացա։ Մոտեցա, միացրի ազդանշանը և սկսեցի սպասել ուղևորին», — պատմում է Աննան։
Մայթին կանգնած երիտասարդը մե՛կ մեքենային էր նայում, մե՛կ հեռախոսին։ Աննան անմիջապես գլխի ընկավ, որ նա է պատվիրատուն, բայց վերջինս ոչ մի կերպ չեր կարողանում հասկանալ, թե ինչու է ղեկի դիմաց ոչ թե մորուքավոր տղամարդ նստած, այլ կին։
«Այդպես անցավ մի քանի րոպե, հետո գլխով նշան արեցի նրան և ասացի, որ «ճիշտ հասցեով է եկել»։ Նա նստեց, և մենք երկուսով սկսեցինք ծիծաղել։ Երեք րոպե ծիծաղում էինք և ոչ մի կերպ չէինք կարողանում հանգստանալ», — պատմում է Աննան։
Եղել են դեպքեր, երբ նրա մեքենան գինովցած մարդիկ են նստել։ Սկզբում տհաճ է եղել, բայց նրանք այնքան կոռեկտ են պահել իրենց, որ Աննան ամաչել է իր կասկածների համար։
Կին վարորդ տեսնելիս բոլորից շատ ուրախանում են աղջիկները։ Շատերը նույնիսկ հարցնում են, թե ինչպես կարելի է աշխատանքի ընդունվել։ Իսկ երիտասարդ տղաները հաճախ ասում են` երկրում իսկապես իրավիճակ է փոխվել։
Իսկ երեխա՞ն
Աննան շատ է մտահոգվում 11-ամյա որդու համար, որը քնելուց առաջ անպայման զանգում է մորը` իմանալու համար, թե ինչպես է նա, երբ է տուն գալու, հետո բարի գիշեր է մաղթում ու քնում։
«Երբեմն գալիս եմ տուն և դռան մոտ գրություն եմ գտնում։ Երևի կարոտում է», — ասում է Աննան։
Չնայած ծանրաբեռնված գրաֆիկին` Աննան հասցնում է հեռախոսով ստուգել տնային հանձնարարությունները, մինչ ավտոմեքենան կանգնած է լինում գազալցակայանում։ Նա չի զղջում, որ այդքան ժամանակ է ծախսում աշխատանքի վրա, որովհետև կարողանում է երեխային ապահովել այն ամենով, ինչ անհրաժեշտ է։
Աննան բոլորին խորհուրդ է տալիս չկասկածել, որ տաքսու վարորդ կարող են աշխատել բոլոր կանայք։
