ԵՐԵՎԱՆ, 2 հոկտեմբերի — Sputnik. ԱԺ խոսնակ Արա Բաբլոյանը արցունքները զսպելով պատմեց իր կյանքի ամենաարժեքավոր խորհրդի մասին, որը տվել է աշխարհահռչակ երգիչ Շառլ Ազնավուրը։
Բաբլոյանն ու Ազնավուրը ծանոթացել են Հայաստանում Սպիտակի երկրաշարժի ժամանակ։ Այդ օրվանից նրանք մտերմացել են։ Այսօր Բաբլոյանը այցելեց շանսոնյեի տուն-թանգարան, որտեղ գրառում կատարեց սգո մատյանում։
«Նա համոզված էր, որ աշխարհը բարդ է, և որ ցանկացած դեպքում մարդ պետք է պահպանի իր կերպարը։ Դա իմ կյանքի ամենակարևոր խորհուրդն էր, և ես փորձում եմ հետևել դրան», — Sputnik Արմենիայի թղթակցի հետ զրույցում ասաց Բաբլոյանը։
Նա ընդգծեց, որ սիրում է Շառլի բոլոր երգերը և չի կարող առանձնացնել դրանցից որևէ մեկը։ Բաբլոյանը խոստովանեց, որ կապված է Ֆրանսիայի հետ, հիմնականում` Ազնավուրի շնորհիվ։ Հիշեց նաև իրենց շփումը Սպիտակի երկրաշարժի ժամանակ։
«Երբ 1991 թվականին ինձ առողջապահության նախարար նշանակեցին, մեր շփումն ավելի գործնական դարձավ։ Ազնավուրի հիմնադրամը շարունակեց աշխատել նաև հետո», — ասաց Բաբլոյանը։
Պաշտոնը լքելուց հետո նրանք ավելի սերտ և բարեկամական շփում են հաստատել։
Բաբլոյանը հպարտ է, որ մտերիմ է եղել մեծագույն երգչի հետ։ Նա համոզված է, որ Ազնավուրը կմնա շատերի սրտերում, իր սրտում։ Այս մասին խոսելիս Բաբլոյանի աչքերը լցվեցին, իսկ շուրթերը դողացին։
Համաշխարհային հռչակ է ձեռք բերել 1956թ.-ին Փարիզի դահլիճներից մեկում հաջող ելույթից հետո։ Նրա գրած երգերը կատարել են Էդիտ Պիաֆը, Լայզա Մինելին, Մստիսլավ Ռոստրոպովիչը, Հուլիո Իգլեսիասը, Շերը, Ջո Դասենը, Ռեյ Չարլզը և այլք։
Շառլ Ազնավուրը միջազգային ասպարեզում ռեկորդային թվով ձայնասկավառակ է վաճառել (180 մլն)։
