ԵՐԵՎԱՆ, 1 հոկտեմբերի — Sputnik. ՀՀ արտգործնախարար Զոհրաբ Մնացականյանն առիթ է ունեցել շփվելու մեծագույն երգիչ Շառլ Ազնավուրի հետ։ Նախարարն այս մասին ասաց այսօր` հոկտեմբերի 1-ին, Երևանում երգչի հիշատակին նվիրված մոմավառության ժամանակ։
«Անձնապես պատիվ ունեցել եմ նրա հետ շփվելու, ոչ հաճախ, բայց առիթներ եղել են։ Շատ պարզ մարդ էր` իր մտքերով, արտահայտություններով, հանգիստ էր, մարդամոտ»,- ասաց Մնացականյանը հիշեցնելով նաև, որ Ազնավուրը Հայաստանի ազգային հերոսներից էր։
Մնացականյանը պատմեց նաև, որ ներկա է եղել նաև Ազնավուրի համերգին։
«Այն ժամանակ նա 92 տարեկան էր։ Երկու ժամ նա էներգիայի մեջ պահեց մոտ 5000 հանդիսատեսի։ Ես այդ ժամանակ մտածեցի` եթե ես երբևէ ինքս ինձ ասեմ, որ հոգնած եմ, կամաչեմ։ Այդպիսին էր Ազնավուրը` էներգիայով, կյանքի հանդեպ սիրով»,- ասաց նա։
Նախարարը նաև մի դրվագ պատմեց իր կյանքից։
«Ես դեսպան էի Ժնևում, երիտասարդ էի, մտնում էի ՄԱԿ, մեքենան կանգնեց դարպասի մոտ, անվտանգության աշխատակիցներից մեկն ասաց` դուք նոր եք, պարոն դեսպան, ձեզ դեռ չենք ճանաչում, ո՞ր երկրի դեսպանն եք։ Ասացի` Հայաստանի։ Ասաց` օ, Հայաստան, Շառլ Ազնավուր, դուք այստեղ կարող եք մտնել առանց խոչընդոտի»,- ասաց նա` նշելով, որ այս մի փոքր դրվագն ապացուցում է Ազնավուրի մեծությունը։
