ԵՐԵՎԱՆ, 30 սեպտեմբերի — Sputnik. ՀՀ Կենտրոնական ընտրական հանձնաժողովն այսօր կայացած արտահերթ նիստում ամփոփել է Երևանի ավագանու 2018 թվականի սեպտեմբերի 23-ի արտահերթ ընտրությունների արդյունքները և ներկայացրել, թե որ քաղաքական ուժը քանի մանդատ է ստանում:
Այս մասին տեղեկացնում են ՀՀ ԿԸՀ մամուլի ծառայությունից։ «Կենտրոնական ընտրական հանձնաժողովը, հիմք ընդունելով ընտրական տեղամասերում քվեարկության արդյունքների վերաբերյալ արձանագրությունները, վերահաշվարկի արդյունքները, քվեարկության արդյունքների վերաբերյալ ընդունած որոշումները, կազմել է արձանագրություն` Երևանի ավագանու արտահերթ ընտրության քվեարկության արդյունքների վերաբերյալ»,–ասված է հաղորդագրության մեջ:
Կենտրոնական ընտրական հանձնաժողովի որոշմամբ՝ Երևանի ավագանին ընտրվել է, և մանդատները բաշխվել են հետևյալ կերպ՝
1) «Իմ քայլը» կուսակցությունների դաշինք՝ 57 մանդատ
2) «Բարգավաճ Հայաստան» կուսակցություն՝ 5 մանդատ
3) «Լույս» կուսակցությունների դաշինք՝ 3 մանդատ:
Կենտրոնական ընտրական հանձնաժողովը կայացրել է նաև Երևանի ավագանու արտահերթ ընտրությունների արդյունքների վերաբերյալ որոշում, համաձայն որի ընտրությունների նախապատրաստման և քվեարկության ընթացքում տեղի չեն ունեցել Հայաստանի Հանրապետության ընտրական օրենսգրքի այնպիսի խախտումներ, որոնք կարող էին ազդել ընտրության արդյունքի վրա:
