ԵՐԵՎԱՆ, 30 սեպտեմբերի –Sputnik. ԱԺ արտահերթ ընտրությունների անցկացումը երկրի տնտեսական շահերից է բխում: Այս մասին այսօր լրագրողներին ասաց ՀՀ վարչապետ Նիկոլ Փաշինյանը։
«Արտահերթ խորհրդարանական ընտրություններ անցկացնելու հարցը, ըստ էության, Հայաստանի ժողովրդի պահանջն է։ Բացի այդ դա նաև կառավարության ծրագիր մի մասն է, որի համար քվեարկել է նաև խորհրդարանը», – ասաց Փաշինյանը։
Նրա խոսքով` պետք է քննարկել ժամկետներն ու արագացնել ընտրությունների անցկացումը։ Կոնկրետ ժամկետներ Փաշինյանը չնշեց։ Ընդ որում, վարչապետի կարծիքով, բիզնեսը, ներդրողները սպասման ռեժիմում են։
Եվ հենց տնտեսական շահերից ելնելով պետք է անցկացվեն այդ ընտրությունները։
Փաշինյանը հույս հայտնեց, որ Երևանի ավագանու ընտրությունները որոշակի պարզություն մտցրեցին քաղաքական իրավիճակում։
Ավելի վաղ վարչապետ Նիկոլ Փաշինյանը, Նյու Յորքից ուղիղ եթերի դուրս գալով, հայտարարել էր, որ Հայաստան վերադառնալուն պես մտադիր է քննարկել քաղաքական ուժերի հետ երկրում ԱԺ արտահերթ ընտրությունների անցկացման հնարավորությունը։
ՀՀԿ փոխնախագահ, ԱԺ պատգամավոր Գալուստ Սահակյանը սեպտեմբերի 27-ին կուսակցության գործադիր մարմնի նիստից հետո լրագրողներին ասաց, որ ՀՀԿ–ն պատրաստ է մասնակցել արտահերթ խորհրդարանական ընտրություններին, եթե դրանք կայանան։
