ԵՐԵՎԱՆ, 29 սեպտեմբերի — Sputnik, Մարիա Շելուդյակովա. Հոր սպանության մեջ մեղադրվող Խաչատուրյան քույրերի համար երևի թիկնապահներ վարձեն, Sputnik-ին հաղորդել է աղջիկների մտերիմ ընկերուհի Ելենան (անունը փոխված է):
Օրեր առաջ Մոսկվայի Բասմանյան դատարանը հավանություն է տվել Խաչատուրյան քույրերի կալանքը «որոշակի գործողությունների արգելքով» փոխարինելու միջնորդությանը։ Այժմ մեղադրյալներին արգելվում է գիշերային ժամերին լքել բնակության վայրը և որևէ մեկի հետ շփվել առանց Պատժի կատարման դաշնային ծառայությանը տեղեկացնելու։ Առավոտյան 7-ից երեկոյան 9-ը քույրերը կարող են քաղաքում ինքնուրույն շրջել առանց ուղեկցման և տեղեկացնելու։ Նրանց վրա էլեկտրոնային թևնոցներ չկան, տներում էլ տեսախցիկներ չեն տեղադրվել։
Ընկերուհին նշել է, որ, չնայած հսկողության բացակայությանը, Խաչատուրյան քույրերը չեն կարող ազատ տեղաշարժվել բազմաթիվ անբարյացակամ անձանց ու լրագրողների պատճառով, որոնք կհետապնդեն նրանց:
Աղջիկը հաճախ է զանգում քույրերի մորը՝ Աուրելիա Դունդուկին: Sputnik Արմենիայի թղթակիցը կապ է հաստատել քույրերի մոր հետ, սակայն նա հրաժարվել է խոսել. հոգնել է մամուլի սևեռուն ուշադրությունից:
Տանն ավելի լավ է
Ելենան նշել է, որ քննչական մեկուսարանում աղջիկները չեն բողոքել պայմաններից, բայց նոր բնակարաններում ավելի լավ է: Խաչատուրյան քույրերը կարոտում են իրենց ընկերներին և հույս ունեն, որ կկարողանան հանդիպել նրանց հետ:
«Աղջիկները, իհարկե, ուրախ են խափանման միջոցը փոխելու համար: Քույրերի համար ամենածանրն այն է, որ նրանց չի կարելի հանդիպել: Ես կփորձեմ հանդիպել յուրաքանչյուրի հետ, շատ եմ կարոտել նրանց: Քույրերը մեզ նույնպես կարոտում են: Հիմա նրանց համար ավելի լավ է, խցերում նրանց չէր հերիքում «քաղաքակրթությունը», հիմա նրանք տանն են, հարմարավետության մեջ», — նշել է Ելենան:
«Քրիստինան հաճախ էր ինձ գրում մենախցից, ասում էր, որ նորմալ է զգում իրեն, ոչ ոք չի նեղացնում: Հակառակը`բոլորը փորձում են օգնել և աջակցել: Շատերն են նրանց նամակներ գրել՝ ծանոթ և անծանոթ: Միայն Անգելինան է բողոքել, որ զբաղվելու բան չկա: Նա անընդհատ գիրք է կարդացել: Իսկ Մարիան դժգոհել է հիվանդանոց տեղափոխվելու պատճառով: Ո՞վ ուրախ կլինի հոգեբուժարան տեղափոխվելու համար», — պատմել է ընկերուհին:
Մարիա Խաչատուրյանը վերջին երեք շաբաթն անցկացրել է հոգեբուժարանում: Մասնագետները ստուգել են կրտսեր քրոջ մեղսունակությունը:
Աղմկահարույց սպանությունը տեղի է ունեցել հուլիսի 27-ին Մոսկվայի հյուսիս-արևելքում։ Երեք քույրերը հայտնել էին իրենց հորը` Միխայիլ Խաչատուրյանին սպանելու մասին։ Հարցաքննության ժամանակ քույրերը խոստովանել էին իրենց մեղքը և բացատրել, որ «իրենք վատ հարաբերություններ են ունեցել հոր հետ, քանի որ հայրը տարիներ շարունակ բարոյապես տանջել է նրանց»։ Մոսկվայի Օստանկինյան դատարանը օգոստոսի 2-ին կալանավորել է երեք քույրերին։
