ԵՐԵՎԱՆ, 27 սեպտեմբերի — Sputnik. «Բարգավաճ Հայաստան» կուսակցության Աջափնյակի նախընտրական շտաբի պետը Գ.Գ-ն ձերբակալվել է:
Նա մեղադրվում է իշխանության ներկայացուցչի նկատմամբ բռնություն գործադրելու և ինքնիրավչության համար։
Այս մասին հայտնում է ՀՀ քննչական կոմիտեն` միաժամանակ նաև որոշ մանրամասներ ներկայացնելով սեպտեմբերի 22-ի երեկոյան ԲՀԿ Աջափնյակի նախընտրական շտաբում տեղի ունեցած դեպքերի մասին։
Այսպես` ՀՀ ոստիկանության Երևան քաղաքի վարչության Մաշտոցի բաժնի հետաքննության բաժանմունքի ավագ տեսուչը ընտրակաշառք բաժանելու մասին հաղորդում ստանալուց հետո, սեպտեմբերի 22-ին, 18:00-ին այցելել է Երևանի Բաշինջաղյան փողոցում գտնվող ԲՀԿ նախընտրական շտաբ։
Դեպքի վայրի զննություն կատարելով` տեսուչը վերցրել է շինության տեսախցիկների տեսաձայնագրությունների կրիչը։ Շտաբի պետ Գ.Գ-ն, նկատելով դա, փորձել է խոչընդոտել կրիչի առգրավումն ու դուրսբերումը։ Դռան շրջանակն ու ապակին կոտրելով՝ Գ.Գ.-ն բացել է շտաբի դուռը և բղավելով ներս կանչել դրսում հավաքված շուրջ քառասուն երիտասարդների՝ նրանց հրահանգելով կոտրել սրահում ամեն ինչ և արգելել տեսաձայնագրությունների հիշողության սարքի դուրսբերումը տարածքից:
Բացի այդ, Գ.Գ-ն ոստիկանության աշխատակիցների նկատմամբ կատարել է կյանքի և առողջության համար վտանգավոր բռնություն` նրանց ծառայողական պարտականությունների կատարման ժամանակ:
Քննչական կոմիտեից հայտնում են, որ նախաքննությունը շարունակվում է, միջոցներ են ձեռնարկվում՝ դեպքի բոլոր հանգամանքները պարզելու, միջադեպին մասնակից անձանց շրջանակը հստակեցնելու և նրանցից յուրաքանչյուրի գործողություններին քրեաիրավական գնահատական տալու ուղղությամբ:
