ԵՐԵՎԱՆ, 26 սեպտեմբերի — Sputnik. «Սուրբ Գրիգոր Լուսավորիչ» բժշկական կենտրոնում թթվածնի բալոնի պայթյունի հետևանքով մահացած Վահրամ Գասպարյանն անհրաժեշտ պատրաստվածություն և թույլտվություն է ունեցել` բարձր ճնշման տակ գտնվող սարքը շահագործելու համար։
Այդ մասին Sputnik Արմենիայի թղթակցի հետ զրույցում հայտարարեց Տեխնիկական անվտանգության ազգային կենտրոնի գլխավոր մասնագետ Ռիմա Դանիելյանը։
Հիշեցնենք, «Սուրբ Գրիգոր Լուսավորիչ» հիվանդանոցում թթվածնային բալոնի պայթյունը տեղի է ունեցել սեպտեմբերի 25–ի կեսօրին։ Պայթյունի հետևանքով մահացել է հիվանդանոցի թթվածնային կայանի տեխնիկ-օպերատոր Վահրամ Գասպարյանը, երկար տարիներ համատեղության կարգով նաև մանկական բաժանմունքի վարորդ է եղել։ Պայթյունից տուժած երկրորդ անձը ևս թթվածնային կայանի աշխատակից է։
Ինչպես նշել է բժշկական կենտրոնի տնօրենի պաշտոնակատար Արման Հովակիմյանը, թթվածնային բալոնը հիվանդանոցին չի պատկանել։
Սոցցանցերում տեղեկատվություն է շրջանառվել այն մասին, որ պայթյունը տեղի է ունեցել անվտանգության չափանիշներին կայանի անհամապատասխանության պատճառով։ Հաղորդվում է նաև, որ բոլոր փորձառու աշխատակիցներին հեռացրել են, իսկ նոր աշխատողները վատ են կատարում իրենց գործը։
Դանիելյանը պատմեց, որ թթվածնային կայանն ամեն տարի ստուգվել է, և ամեն անգամ հանձնաժողովը դրական եզրակացություն է տվել։ Նրա խոսքով` կայանը համապատասխանել է անվտանգության բոլոր անհրաժեշտ չափանիշներին։ Սարքի հետ ամեն ինչ կարգին է եղել, իսկ բալոնների կափույրները` նորմերին համապատասխան վիճակում։
«Մինչև շահագործման հանձնելը կայանում անցկացվել են բոլոր անհրաժեշտ ստուգումները, իսկ աշխատակիցները նախապատրաստում են անցել և բարձր ճնշման տակ գտնվող սարքի հետ աշխատելու թույլտվություն ստացել», – գրել է նա։
Դանիելյանը նշեց, որ թթվածնային բալոնները շահագործելիս շատ կարևոր է մարդկային գործոնը։ Նա կոչ արեց չափազանց զգույշ վարվել դրանց հետ` հաշվի առնելով, որ նվազագույն անզգուշությունը կարող է հանգեցնել պայթյունի և ողբերգությունների։
