ԵՐԵՎԱՆ, 26 սեպտեմբերի — Sputnik. Ո՞վ է հայաստանյան գործող խորհրդարանի ընդդիմությունը։ Այս հարցի շուրջ խորհրդարանական քաղաքական ուժերն այսօր շուրջ 40 րոպե քննարկում անցկացրին։
Բանավեճի պատճառը քննիչ հանձնաժողովի նախագահի տեղակալ ընտրելն էր։ Հանձնաժողովի նախագահ Գևորգ Կոստանյանը հիշեցրեց, որ «ԱԺ կանոնակարգ» օրենքի համաձայն՝ տեղակալը պետք է ընդդիմության ներկայացուցիչ լինի. «Հարց է առաջնում՝ ո՞վ է ընդդիմությունը ԱԺ-ում այսօր», — ասաց Կոստանյանը։
«Ելք» խմբակցության պատգամավոր Հովիկ Աղազարյանն ընդգծեց, որ իրենց խնդիրը չէ որոշել, թե ով է ընդդիմությունը՝ առաջարկելով տեղակալին նշանակել «Ելք» խմբակցությունից։
«Ծառուկյան» խմբակցության պատգամավոր Գևորգ Պետրոսյանն էլ նկատեց` Հայաստանում ստեղծված իրավիճակում դասական իմաստով մաքուր ընդդիմություն գոյություն չունի, և նա առաջարկեց` քանի որ նախագահը ՀՀԿ-ից է, տեղակալ նշանակել ՀՅԴ-ից կամ «Ելք» խմբակցությունից:
ՀՀ ԱԺ փոխնախագահ Արփինե Հովհաննիսյանն էլ կարծիք հայտնեց, որ ընդդիմություն պետք է համարել նրանց, ովքեր ԱԺ ձևավորման ժամանակ իրենց հայտարարել էին ընդդիմություն, և առաջարկեց հանձնաժողովի տեղակալ նշանակել «Ելքի» պատգամավորներից որևէ մեկին։
Ի վերջո, երկար բանավեճերից հետո հանձնաժողովի նախագահի տեղակալ ընտրվեց «Ելք» խմբակցության պատգամավոր Ալեն Սիմոնյանը։
Դրանից հետո Քննիչ հանձնաժողովը հայտարարեց ընդմիջում, իսկ հանձնաժողովի նախագահ Գևորգ Կոստանյանը բոլորին հրավիրեց իր աշխատասենյակ` աշխատակարգային հարցերի քննարկման։
Հիշեցնենք` սեպտեմբերի 11-ին հայաստանյան մամուլում հրապարակվել էր ԱԱԾ տնօրեն Արթուր Վանեցյանի և ՀՔԾ պետ Սասուն Խաչատրյանի գաղտնալսված հեռախոսազրույցը, որտեղ պաշտոնյաները խոսում էին Մարտի 1-ի քրեական գործով անցնող մեղադրյալների` ՀՀ երկրորդ նախագահ Ռոբերտ Քոչարյանի և ՀԱՊԿ քարտուղար Յուրի Խաչատուրովի նկատմամբ խափանման միջոցներ կիրառելու և դրանց շուրջ դատավորի հետ ունեցած զրույցի մասին։
Այս փաստով, թեև կա հարուցված քրեական գործ, բայց ՀՀԿ խմբակցության առաջարկով ԱԺ-ում ստեղծվեց քննիչ հանձնաժողով, որը պետք է քննի արդարադատության իրականացմանը խոչընդոտելու, արդար դատաքննության իրավունքի և հեռախոսային խոսակցությունների գաղտնիությունը խախտելու փաստերի առնչությամբ երկրում մարդու իրավունքների պաշտպանվածության մակարդակը։
Հանձնաժողովի առաջին նիստը կայացել է սեպտեմբերի 19-ին և տևել 20 րոպե` առանց օրակարգային հարցերի քննարկման։
