ԵՐԵՎԱՆ, 26 սեպտեմբերի — Sputnik. Արագածոտնի մարզի գյուղերի բնակիչները փակել են «Հյուսիս–հարավ» տրանսպորտային միջանցքը` պահանջելով, որպեսզի կառուցվեն անցումներ, շրջադարձեր և անցուղիներ։ Այժմ Երևանից Ապարան մեկնելիս հնարավորություն չկա շեղվել ճանապարհից և անցնել գյուղերի ճանապարհներ, և նրանք ստիպված են անցնել 10 կմ և ավելի։ Այդ մասին հայտարարեց Արագածոտն գյուղի գյուղապետ Մելսիկ Ղազարյանը։
Հարակից գյուղերի բնակիչները հայտնվել են արհեստական «մեկուսացման» մեջ, նոր ճանապարհով գյուղ հասնելն ավելի շատ ժամանակ է խլում, քան նախկինում։ Նրա խոսքով` «Հյուսիս–հարավ» շինարարության նախնական նախագծով այդ ամենը նախատեսված է եղել, սակայն հետո պլանը փոխվել է։ Նա հաղորդեց, որ մարզպետը և վարչապետ Նիկոլ Փաշինյանը գիտեն խնդրի մասին, սակայն առայժմ ոչ մի փոփոխություն չկա։
Ցուցարարների մոտ գնացել է մարզպետարանի աշխատակիցը։ Նա հանձնել է Արագածոտնի մարզպետ Աշոտ Սիմոնյանի առաջարկը խումբ ձևավորելու մասին, որը կքննարկի հարցը մարզպետարանում։ Սակայն բողոքի ակցիայի մասնակիցները պահանջեցին, որպեսզի Սիմոնյանն անձամբ գա և զրուցի իրենց հետ։ Նրանք նաև ցանկանում են հանդիպել տրանսպորտի նախարարության ներկայացուցիչների հետ։
Ճանապարհը կառուցող ինժեներների, ոստիկանության մարզային բաժնի պետի, ինչպես նաև գյուղապետերի ու մարզպետարանի ներկայացուցիչների հետ երկար բանակցությունների հետո գյուղացիները համաձայնեցին բացել ճանապարհը և երկուշաբթի բանակցություններ սկսել իշխանությունների հետ։ Գյուղացիները նշում են, որ եթե հարցը երկուշաբթի չլուծվի, ապա ով էլ գա նրանց մոտ, ճանապարհը չեն բացի։
«Հյուսիս-հարավ» տրանսպորտային միջանցքը ռազմավարական նշանակություն ունի Հայաստանի համար։ 550 կմ երկարություն ունեցող այդ ճանապարհը թույլ կտա դուրս գալ դեպի Սև ծով և եվրոպական երկրներ՝ կապ ապահովելով Իրանի և Վրաստանի հետ:
Հայաստանը դեռևս 2009 թվականին վարկային համաձայնագիր է ստորագրել Ասիական զարգացման բանկի հետ։ Համաձայնագրով նախատեսվում էր մայրուղու շինարարությունն ավարտել 2016 թվականին, սակայն շինարարական աշխատանքները սկսեցին բանկի հետ պայմանագիրը կնքելուց միան երեք տարի անց։
