ԵՐԵՎԱՆ, 24 սեպտեմբերի — Sputnik. Երևանի ավագանու ընտրությունները ՀՀ վարչապետ Նիկոլ Փաշինյանին ուղղված վստահության հանրաքվեի վերածվեցին։ Այսօր Sputnik Արմենիա մամուլի կենտրոնում այս կարծիքը հայտնեց Ընտրական համակարգերի միջազգային փորձագիտական կենտրոնի նախագահ, Քնեսեթի նախկին պատգամավոր, Հայաստան-Իսրայել հասարակական ֆորումի համանախագահ, դոկտոր Ալեքսանդր Ցինկերը։
«Մարդիկ գնում էին կուսակցության առաջնորդի հետևից։ Մի կողմից սա մեծ հաղթանակ է, մյուս կողմից` պատասխանատվություն։ Այսօր, երբ սկսի աշխատել Ավագանին, բոլոր ձախողումները, քաղաքապետարանի աշխատանքի նկատմամբ բոլոր դժգոհություններն ուղղվելու են Փաշինյանին», — ասաց Ցինկերը։
Նրա խոսքով` զարմանալի չէ, թե ինչու ընտրություններից հետո Փաշինյանը հայտարարեց կարճ ժամկետներում ԱԺ արտահերթ ընտրություններ անցկացնելու մասին։
«Նա հասկացավ, որ սպասել պետք չէ։ Հավանական է, որ այս տարի մենք ձեզ հետ հանդիպենք նաև խորհրդարանական ընտրություններից հետո», — ասաց Ցինկերը։
Սակայն նա ընդգծեց, որ նոյեմբերին խորհրդարանական արտահերթ ընտրություններ հնարավոր չէ անցկացնել, քանի որ դրան նաև խորհրդարանը ցրելու գործընթաց և այլ նրբություններ են նախորդում։
Հիշեցնենք` ՀՀ վարչապետ Նիկոլ Փաշինյանը երեկ Նյու Յորքի հայ համայնքի հետ հանդիպման ժամանակ նշել է, որ Երևան վերադառնալուն պես բանակցությունների է հրավիրելու խորհրդարանական և ոչ խորհրդարանական ուժերի ներկայացուցիչներին ՝ արտահերթ խորհրդարանական ընտրություններ անցկացնելու ժամանակը և պայմանները նրանց հետ քննարկելու համար։
