ԵՐԵՎԱՆ, 23 սեպտեմբերի — Sputnik. Ժամը 13։00-ի դրությամբ ՀՀ գլխավոր դատախազությունը ենթադրյալ ընտրախախտումների վերաբերյալ 123 ահազանգ է ստացել։
Գլխավոր դատախազության պաշտոնական հաղորդագրության համաձայն` դրանցից 106-ը ստուգվել են ոստիկանության կողմից։ Առերևույթ իրավախախտումներից 27-ը վերաբերում են ընտրակաշառք տալուն ու ստանալուն, դրանցից 4–ով հարուցվել է քրեական գործ, նախաքննությունը հանձնարարվել է ՀՀ հատուկ քննչական ծառայությանը:
4 դեպք վերաբերում է քարոզչություն կատարել հարկադրելուն, 55-ը՝ ընտրողների ցուցակները կազմելու կարգի խախտմանը, 2-ը՝ կրկնակի քվեարկությանը, 7-ը՝ քվեարկության գաղտնիությունը խախտելուն, 1-ը՝ լրագրողի գործունեությանը խոչընդոտելուն, 5-ը՝ այլ:
Երևանի ավագանու արտահերթ ընտրությունների նախապատրաստման և անցկացման ընթացքում հնարավոր ընտրական իրավախախտումների վերաբերյալ ԶԼՄ հրապարակումները, քաղաքացիների հաղորդումները և ահազանգերը գրանցելու և հաշվառելու, հաղորդումների քննարկման և դրանց հիման վրա նախապատրաստվող նյութերի ու հարուցված քրեական գործերի նախաքննության նկատմամբ դատախազական հսկողության արդյունավետությունը բարձրացնելու նպատակով ՀՀ գլխավոր դատախազի օգոստոսի 28-ի հրամանով ստեղծվել էր աշխատանքային խումբ:
