ԵՐԵՎԱՆ, 23 սեպտեմբերի — Sputnik. ՀՀ մարդու իրավունքների պաշտպանի գրասենյակը ժամը 15:00-ի դրությամբ Երևանի ավագանու ընտրական գործընթացին վերաբերող 23 ահազանգ է ստացել:
Աշխատանքային խումբն ուսումնասիրել է լրատվամիջոցների և սոցիալական ցանցերի ավելի քան 600 հրապարակում:
Ըստ հաղորդագրության` այսօր առավոտյան թեժ գծին զանգահարած քաղաքացին հայտնել է, որ ընտրողներին կաշառք տալու կասկածանքով նախորդ օրը երեկոյան ինքը բերման է ենթարկվել ոստիկանություն և այնտեղ պահվել մինչև առավոտյան ժամը 06:00-ն: Այդ մասին Մարդու իրավունքների պաշտպանին հաղորդում է ներկայացրել նաև Ազգային ժողովի պատգամավոր, Երևանի քաղաքապետի թեկնածու Նաիրա Զոհրաբյանը:
ՄԻՊ գրասենյակից հայտնում են, որ հիմնական ահազանգերը վերաբերել են հաշմանդամություն ունեցող անձանց համար տեղամասերի անմատչելիությանը, նույնականացման քարտով ընտրելու հնարավորությանը, իրազեկման թերթիկ չստանալուն և այլն:
Իսկ լրատվամիջոցներում և սոցիալական ցանցերում արձանագրված հրապարակումները վերաբերել են տեղամասերի կահավորմանը, հանձնաժողովների անդամների վարքագծին և այլն: Արձանագրվել են քվեարկության գաղտնիության ապահովման խնդիրներ, մասնավորապես՝ քվեաթերթիկների լուսանկարահանման և տարածման դեպքեր:
Արձանագրվել են նաև տեղամասերի մոտակայքում կուտակումների և ընտրողների ուղղորդման դեպքերի վերաբերյալ հրապարակումներ:
ՄԻՊ աշխատակազմն առանձին ուշադրություն է դարձրել լրագրողների և դիտորդների աշխատանքի հնարավոր խոչընդոտների մասին տեղեկություններին:
