ԵՐԵՎԱՆ, 23 սեպտեմբերի — Sputnik. ՀՀ վարչապետ Նիկոլ Փաշինյանն այս պահին Փարիզում է, սպասում է Նյու Յորքի թռիչքին։ Այս մասին վարչապետը հայտնեց Facebook սոցիալական ցանցի ուղիղ եթերում։
«Տեղեկություններ եմ ստացել ընտրությունների մասին։ Հույս ունեմ, որ ունենալու ենք օրինակելի ընտրություններ։ Կա վիճակագրություն, որ անցած տարվա համեմատ ակտիվությունը 1-2 տոկոսով քիչ է։ Դա բացատրվում է նրանով, որ այս տարի մարդկանց «գազելներով» բերել չկա։ Հուսով եմ, որ մեր քաղաքացիներն ակտիվ մասնակցություն կցուցաբերեն, որովհետև այս ընտրությունը բացառիկ է նրանով, որ քաղաքացիների որոշումն է լինելու վճռորոշ»,- ասաց նա։
Փաշինյանը նշեց, որ այս առումով շատ մեծ ինտրիգ է լինելու ընտրությունների արդյունքը, քանի որ այն կախված է ընտրողների որոշումից։
Վարչապետը նշեց, որ ընդհանուր առմամբ գոհ է ընտրության ընթացքից, թեև մեկ-երկու փոքր միջադեպեր, այդուհանդերձ, գրանցվել են։
«Հուսամ` դա չի խանգարի ընդհանուր ընթացքին։ Ես ձեզ բոլորիդ արդեն կարոտել եմ և ևս մեկ անգամ կոչ եմ անում` սիրելի երևանցիներ, գնացեք ընտրատեղամասեր, կատարեք ձեր ընտրությունը, որովհետև ձեր որոշումից է կախված վերջնական արդյունքը։ Ամեն երևանցի պետք է իր ձայնը հստակ բարձրացնի` հասկանալով, որ այդ խոսքը վերաբերում է նաև միջնաժամկետ և ռազմավարական հեռանկարին»,- ասաց նա։
Փաշինյանը հայտնեց, որ իրենց մոտ ամեն ինչ լավ է, եղանակը մի քիչ անձրևոտ է, բայց դա չի ազդի թռիչքի վրա։ Նա հիշեցրեց, որ Հայաստան կվերադառնա սեպտեմբերի 29-ին, որովհետև ԱՄՆ-ից մեկնելու է Տաջիկստան և այնտեղ մասնակցելու է ԱՊՀ երկրների ղեկավարների գագաթնաժողովին։
Վարչապետը Նյու Յորքում մասնակցելու է ՄԱԿ-ի Գլխավոր ասամբլեայի 73-րդ նստաշրջանի աշխատանքներին, որտեղ հանդես կգա ելույթով:
Հիշեցնենք, որ այսօր` սեպտեմբերի 23-ին, առավոտյան 08։00-ին բացվել են 475 ընտրատեղամասերի դռները, և քաղաքացիները մինչև 20։00-ն կարող են ընտրել Երևանի ավագանու ընտրությանը մասնակցող քաղաքական 12 ուժերից որևէ մեկին։
