ԵՐԵՎԱՆ, 22 սեպտեմբերի — Sputnik. «Վարդան Մինասյանի հրաժարականն անսպասելի էր»,– մեկնաբանելով Հայաստանի ազգային հավաքականի գլխավոր մարզչի հրաժարականը` այսօր լրագրողներին ասաց Հայաստանի ֆուտբոլի ֆեդերացիայի նորընտիր նախագահ Արթուր Վանեցյանը։
«Ես Մինասյանի հետ չեմ հանդիպել, ինձ համար անսպասելի էր նրա հրաժարականը։ Հիմա շատ ակտիվ պետք է աշխատենք նոր մարզչի նշանակման ուղղությամբ։ Թեկնածուներ կան և՛ Հայաստանից, և՛ դրսից։ Նրանց անուններն առաջիկա օրերին կներկայացնենք»,–ասաց Վանեցյանը։
Նորընտիր նախագահի խոսքով` ինքը որևէ կերպ չի միջամտելու ազգային հավաքականի կազմի ձևավորմանը։ Գլխավոր մարզիչն ու մարզչական շտաբը կորոշեն ամեն ինչ։
Արթուր Վանեցյանը նաև հավաստիացրեց, որ ազգային հավաքականի հանդիպումների տոմսերի գինը կնվազի։ «Ամենաէժանը հիմա 4 հազար է, կդառնա հազար դրամ»,– ասաց նա։
Հիշեցնենք` այսօր ՀՀ ԱԱԾ տնօրեն Արթուր Վանեցյանն ՀՖՖ ժողովում միաձայն ընտրվեց կազմակերպության նախագահ՝ փոխարինելով 16 տարի պաշտոնավարած Ռուբեն Հայրապետյանին։
