ԵՐԵՎԱՆ, 20 սեպտեմբերի — Sputnik. ՀՀ ջրային կոմիտեի նախագահ Ինեսա Գաբայանը կառավարությունում իր գործընկերներին կոչ է արել օգնել իրեն պայքարել ոռոգման ջրի ապօրինի օգտագործման դեմ։ Այս մասին նա հայտնեց Sputnik Արմենիայի թղթակցի հետ զրույցում։
Այս տարի որոշվել էր Սևանից նախատեսված 170 մլն խմ ջրառին ավելացնել ևս 40 մլն խմ։ Միևնույն ժամանակ Գաբայանը հայտնեց, որ առայժմ դեռ 195.6 մլն խորանարդ մետրն է օգտագործվել։
«Մենք հնարավորինս տնտեսում ենք ջուրը և փորձում օգտագործել լրացուցիչ ջրառը ոչ թե մինչև հոկտեմբերի 1-ը, ինչպես նախատեսված էր, այլ ընդհուպ մինչև աշնանացանի ոռոգումը», – նշել է կոմիտեի ղեկավարը։
Նա մեկնաբանել է տարածքային կառավարման նախարար Սուրեն Պապիկյանի հայտարարությունն այն մասին, որ «լևի» խողովակներով գողանում են Սևանի ջուրը։ Կոմիտեն ստուգումներ է իրականացնում և փորձում հայտնաբերել նման խախտումները, նշեց Գաբայանը։ Նա կոչ է արել կառավարության իր գործընկերներին խախտումներ բացահայտելու և կոնկրետ փաստեր արձանագրելու դեպքում հայտնել ջրային կոմիտե։
«Խոսելը հեշտ է, դժվար է միջոցներ կիրառելը կամ պարզապես ստիպել վճարել օգտագործված ջրի համար», – ընդգծել է կոմիտեի ղեկավարը։
Գաբայանը նաև հերքեց այն տեղեկությունը, որի համաձայն ոռոգման կարիք ունեցող հողատարածքների մակերեսն ավելի քիչ է, քան հայտարարել էին նախկինում։
«Դա այդպես չէ։ Ամեն ինչ ճիշտ հակառակն է։ Եթե Պապիկյանը փաստեր ունի, մենք ուրախ կլինեն, եթե նա տրամադրի դրանք», – ընդգծեց նա։
Կոմիտեի ղեկավարը նույնպես հույս է հայտնել, որ երկու տարվա ընթացքում ոռոգման տարածքների գույքագրում կիրականացվի։
ՀՀ կառավարությունը օգոստոսի 29-ին հավանություն տվեց Սևանա լճից լրացուցիչ 40 մլն խմ ջրառ իրականացնելու նախագծին։ Ինտենսիվ ոռոգման շրջանում, օգոստոսի 25-ից հոկտեմբերի 1-ը, Արարատյան դաշտավայրում ոռոգման ջրի պահանջարկը կազմում է 80 մլն խմ։ Դրանից 40 մլն–ը գյուղացիները կստանան Սևանից, ևս մոտ 19 մլն–ը կապահովվի պոմպակայանների լրացուցիչ աշխատանքի շնորհիվ, 7 մլն` Ազատի ջրամբարից, և ևս մոտ 17 մլն` Հրազդան գետից։
