ԵՐԵՎԱՆ, 19 սեպտեմբերի — Sputnik. Փոփ երգիչ Դիմա Բիլանը ավտոմեքենայով վթարի է ենթարկվել Մոսկվայի Լենինսկի պողոտայում։
Իրավապահ մարմինների աղբյուրը ՌԻԱ Նովոստիին հայտնել է, որ երեքշաբթի երեկոյան Մոսկվայի հարավ-արևմուտքում երգիչն իր Ford Mustang ավտոմեքենայով Hyundai մակնիշի ավտոմեքենայի է բախվել։ Ոստիկանությունը հաստատել է Լենինսկի պողոտայում տեղի ունեցած վթարի փաստը` չնշելով մասնակիցներին։ Վթարի հետևանքով տուժածներ չկան։
Բիլանն արդեն հանգստացրել է իր երկրպագուներին` դիմելով նրանց Instagram-ի իր էջի միջոցով։ Արտիստը խոստովանել է, որ ՃՏՊ-ն իր մեղքով է տեղի ունեցել, որովհետև իր ուշադրությունը մի պահ շեղվել ղեկի դիմաց նստած։
«Ամեն ինչ նորմալ է։ Սթրեսի, իհարկե, ենթարկվեցի, բայց ինչ ասես, որ չի լինում այս կյանքում… ավտոմեքենայի սրահ ծուխ էր լցվել, անվտանգության բարձիկները կտրուկ աշխատեցին, բայց հարվածն այնքան զգալի էր, որ գլխումս ամեն ինչ շրջվեց… Շոկի մեջ եմ դեռ, ինքներդ եք հասկանում ադրենալինի և կորտիզոլի ժայթքում էր… ֆու, ձեռքերս դողում են… ամեն ինչ կարգին է։ Բոլորի մոտ։ Ես եմ մեղավոր վթարի համար, ուշադրությունս շեղվել էր։ Ես եմ կանչել պարեկային ծառայությանը 112 համարով, հրշեջներին և շտապ օգնության ավտոմեքենային, դե որ օրինական դաշտում լինի և առանց զրպարտության, առանց ասեկոսեների և բամբասանքի», — գրել է երգիչը։
Բիլանը նաև կոչ է արել երկրպագուներին իր սխալները չկրկնել և ճանապարհին ավելի ուշադիր լինել։
