ԵՐԵՎԱՆ, 19 սեպտեմբերի — Sputnik. Երևանի քաղաքապետի թեկնածու, «Ժողովրդավարական ուղի» կուսակցության առաջնորդ Մանուել Գասպարյանն այսօր ընդհատել է նախընտրական քարոզարշավը մոր մահվան պատճառով։ Այդ մասին Sputnik Արմենիայի թղթակցի հետ զրույցում հաղորդեցին կուսակցության շտաբից։
Սեպտեմբերի 23–ին կուսակցությունը և նրա առաջնորդը կմրցեն 11 թեկնածուների հետ արդեն Երևանի ավագանու արտահերթ ընտրությունների օրը։
«Ժողովրդավարական ուղու» ներկայացուցիչներն աչքի են ընկել ոչ միայն հնչեղ անվանմամբ, այլ նաև քաղաքական առումով որոշակի միապետական ժառանգորդությամբ։ Կուսակցության ղեկավարությունը հորից անցել է որդուն։ «Ժողովրդավարական ուղի» կուսակցության հիմնադիրը Հայաստանի խորհրդարանի նախկին պատգամավոր Մանուկ Գասպարյանն է։ Նրա մահից հետո կուսակցությունը գլխավորել է որդին` Մանուելը։
Մանուել Գասպարյանը 2009թ–ին պայքարել է Երևանի Քանաքեռ–Զեյթուն վարչական շրջանի ղեկավարի պաշտոնի համար, սակայն պարտվել է ՀՀԿ թեկնածուին։ Գասպարյանը մինչև հիմա վստահ է իր հաղթանակի մեջ և կարծում է, որ այդ ժամանակ ընտրությունները կեղծված են եղել։
Կուսակցությունն անհաջողություն է կրել նաև 2012թ–ի համապետական ընտրություններում։ 2017թ–ին «Ժողովրդավարական ուղին» որոշել է չմասնակցել խորհրդարանական ընտրություններին` համարելով, որ ապրիորի չարժե միջոցներ ծախսել ձախողված գործի վրա։
Գասպարյանի և նրա կուսակցության մասնակցությունը քաղաքապետի պաշտոնի համար գալիք ընտրություններում լիովին հիմնավորված է. երկրում «իրավիճակ է փոխվել» և վստահություն է ծագել, որ «ամեն ինչ կանցնի ազնիվ, արդար և թափանցիկ»։
«2017թ–ին մենք խրված էինք կոռուպցիայի ճահճի մեջ, հավանականությունը, որ ընտրություններն արդար կլինեն, հավասար էր զրոյի։ Այսօր երկրում իրավիճակ է փոխվել, և մենք որոշել ենք մտնել Երևանի համար մրցապայքարի մեջ», – ասաց մեր զրուցակիցը։
Կուսակցությունը ցանկանում է օգնել գործող իշխանություններին և դառնալ նրանց թիմի մասը։ Չնայած ընդհատված նախընտրական քարոզարշավին` դեմոկրատները բարձր են գնահատում հաղթանակելու իրենց շանսերը։ Ավելին, կուսակցությունում ավագանու ընտրությունները համարում են վարժանք Հայաստանի համար պայքարում։
Կուսակցությունը մտել է պայքարի մեջ «Երևանը ես եմ, Երևանը դու ես, Երևանը մենք ենք» կարգախոսով։ Սակայն «Ժողովրդավարական ուղու» ծրագիրը քիչ է տարբերվում մնացածից։
Նրանք առաջարկում են երևանցիներին օգտվել էկոլոգիապես մաքուր տրանսպորտից, ինչպես նաև նորացնել ավտոբուսային պարկը։ Միաժամանակ էկոտրանսպորտը կկազմի ընդհանուր թվի 20 տոկոսը։ Կուսակցությունն այդ նպատակի համար գումար կվերցնի Ասիական զարգացման բանկից։ Կուսակցությունում պարզաբանում են, որ ԱԶԲ–ն էլեկտրատրանսպորտի համար տրամադրում է վարկ` տարեկան 0 տոկոսադրույքով։
Նրանք նաև մտադիր են «խելքի բերել» աղբահանում իրականացնող Sanitek ընկերությանը` ստիպելով նրան ինչպես հարկ է մաքրել Երևանը։
Վերելակները կփոխվեն, կհարմարեցվեն սահմանափակ հնարավորություններով մարդկանց համար։ Համատիրությունները կլուծարվեն, դրանց համար պատասխան կտա հենց քաղաքապետը։
Ինչ վերաբերում է բյուջեն լցնելու սխեմային, ապա դեմոկրատների կարծիքով այստեղ պետք է միայն արմատախիլ անել կոռուպցիան։
Ավելի վաղ Գասպարյանը նշել էր, որ քաղաքապետ դառնալու դեպքում նա առաջին հերթին կարգելի բարձրահարկ շենքեր կառուցել քաղաքի կենտրոնում։ Նրա կարծիքով` Երևանն առանց այդ էլ խեղդվում էր բարձրահարկ շենքերից, այնպես են կառուցվել, ասես համբուրվում են։ Նա նաև առաջարկել է շինարարական ընկերություններին կառուցապատել մայրաքաղաքի ծայրամասերը և չսահմանափակվել «փոքր կենտրոնով»։
Եթե «Ժողովրդավարական ուղին» գա իշխանության, ապա Երևանի կենտրոնում կհայտնվի 2008թ–ի մարտի 1–ի 10 զոհերին նվիրված հուշարձան։
