ԵՐԵՎԱՆ, 19 սեպտեմբերի — Sputnik. Չի բացառվում, որ Հայաստանում աղբամշակման գործարան կառուցելուն խանգարել են որոշակի անձինք։ Այսօր հրավիրված ասուլիսի ժամանակ լրագրողներին ասաց ՀՀ տարածքային կառավարման և զարգացման նախարար Սուրեն Պապիկյանը։
Նրա խոսքով` աղբավայրերում ինչ-որ անհայտ մարդիկ են աշխատում, որոնք, ըստ ամենայնի, եկամուտ են ստանում աղբի տեսակավորումից ու վաճառքից, և ակնհայտ է, որ նրանց ձեռնտու չէ գործարանի կառուցումը։
«Չի բացառվում, որ նրանք են խոչընդոտել գործարանի բացումը»,- ասաց Պապիկյանը։
Պատասխանելով Sputnik Արմենիայի հարցին, թե հնարավո՞ր է, որ Նուբարաշենի աղբավայրը տեղափոխվի, նախարարը նշեց, որ ավելի նպատակահարմար է համարում այն փակելը։ Նա ընդգծեց, որ այդ տարածքում կան սողանքի խնդիրներ, արտանետումներ, վնասակար նյութեր, որոնք խառնվում են ջրերին:
«Հարցը քննարկվում է փորձագետների հետ, և ես անձամբ եկել ե մ այն եզրակացության, որ ավելի լավ կլինի, որ աղբավայրը տեղափոխվի։ Աղբավայրի համար նման վայր կա Ջրվեժի մոտակայքում, որտեղ կավային համակարգը թույլ չի տալիս, որ այդ ջրերը գնան և խառնվեն ստորջրյա ավազանին: Եվ նման հնարավորություն կա նաև Աջափնյակի մերձակա տարածքում, ներկայումս գործող երկրորդ աղբավայրից մի փոքր հեռու: Աշխարհագրական դիրքն այնպիսին է, որ քամիները և տհաճ հոտը, որ գալիս է դեպի Երևան, այդ հատվածում կմնա տարածքում եւ դուրս չի գա»,- ասաց Պապիկյանը:
Նշենք, որ այս տարի աղբի թեման շատ սրվեց հատկապես մայրաքաղաքում։ Ամռան ամիսներին աղբահանությունը Երևանում պատշաճ ձևով չէր իրականացվում։ Իրավիճակը սրում էր անոմալ շոգը, որի հետևանքով աղբի կուտակման վայրերում սաստիկ գարշահոտություն էր տարածվում, վտանգավոր վարակների օջախներ էին ի հայտ եկել։ Հուլիսի վերջին ընկերությունը տուգանվեց 12 միլիոն դրամով ու հայտարարեց, որ հաշվի կառնի քաղաքապետարանի դիտողությունները։
