ԵՐԵՎԱՆ, 19 սեպտեմբերի — Sputnik. Իսլամական հեղափոխության պահապանների զորամիավորումը Սիրիայում փրկել է շատ հայերի ու ասորիների կյանքը։
Ինչպես հաղորդում է իրանական Fars գործակալությունը՝ այդ մասին հայտարարել է Իրանի մեջլիսի հայ պատգամավոր Կարեն Խանլարյանը։
Պատգամավորը հատուկ նշել է կորպուսի հրամանատար, գեներալ-մայոր Ղասեմ Սուլեյմանիի արժանիքների մասին։
«Ես շնորհակալ եմ գեներալ Սուլեյմանիին և ռազմական ուժերի այլ ներկայացուցիչների, որոնք գտնվում են Սիրիայում այդ երկրի կառավարության խնդրանքով և անվտանգություն են ապահովում։ Շատ դեպքերում նրանք կոտորածներից փրկել են հայերին ու ասորիներին», – հայտարարել է Խանլարյանը։
Նա նշել է, որ իրանցի զինվորները մարդկանց փրկության գործում անգնահատելի ավանդ են ունեցել Հալեպում, որտեղ բնակվում են տասնյակ հազարավոր հայեր։
Իրանական բանակին իր երախտիքը բազմիցս է հայտնել նաև Խանլարյանի գործընկերը` ասորի պատգամավոր Յոնաթան Բետկելիան։ Նա նշել է, որ արևմտյան երկրների կառավարությունները ոչինչ չեն ասում Իրաքում և Սիրիայում քրիստոնյաների ու եզդիների ողբերգության մասին։
