ԵՐԵՎԱՆ, 15 սեպտեմբերի — Արմենուհի Մխոյան, Sputnik. Հայրաքաղաք Գյումրու հենց սրտում՝ Աբովյան ճեմուղում, բացվեց յուրահատուկ փուռ-սրճարանը: Իր բնույթով ինքնատիպ սրճարանն առայժմ եզակի է ոչ միայն Հայաստանում, այլ նաև տարածաշրջանում: Աշխատանքի անցնելու նախապայմանն այստեղ հաշմանդամությունն է:
Նմանը չունեցող «Արեգակ» ներառական փուռ-սրճարանում աշխատելու են հաշմանդամություն ունեցող երիտասարդները: Այստեղ նրանք ոչ միայն հաց ու թխվածքներ կթխեն, այլ նաև իրենք էլ կմատուցեն: Ծրագիրն իրականացնում են «Հայկական Կարիտաս» բարեսիրական կազմակերպությունն ու «Էմիլի Արեգակ» հաշմանդամություն ունեցող երեխաների և երիտասարդների աջակցության ռեսուրս կենտրոնը։ Նրանք հաշմանդամություն ունեցող երիտասարդներին վերապատրաստելու և աշխատաշուկա ուղղորդելու նպատակ ունեն։
25–ամյա Հովհաննես Մակարյանն ու 20-ամյա Միքայել Սահակյանն իրենց ընկերների հետ աշխատելու են այստեղ: Միքայելը թխելու է, Հովհաննեսը՝ մատուցելու: Իրենց կամքի ուժի ու նպատակասլացության շնորհիվ նրանք աշխատանք ունեն և արդեն կարող են փող վաստակել։ Փող վաստակեն ոչ միայն ծնողներին օգնելու, այլ նաև սեփական ընտանիքը կազմելու համար:
«Աշխատելու եմ այս սրճարանում, համեղ սուրճ եմ մատուցելու և գումար եմ վաստակելու, որ օգնեմ ծնողներիս: Սովորել եմ, թե ինչպես պետք է մատուցել»,-ուրախությունը չթաքցնելով` Sputnik Արմենիային ասաց Հովհաննեսը: Հարցին թե սեփական ընտանիք ունենալու մասին դեռ չի մտածո՞ւմ, Հովհաննեսը շիկնելով պատասխանեց. «Երազանքներիցս մեկը կատարվեց` աշխատանք ունեմ ու կարող եմ գումար վաստակել և ծնողներիս օգնել, սա գործի կեսն է, սրանից հետո կարելի է նաև ընտանիք կազմելու մասին երազել»:
Միքայելին Գյումրիում արդեն բոլորը գիտեն, շատերն են հասցրել համտեսել նրա պատրաստած համեղ հացերն ու թխվածքները: Տղայի դիմանկարով պաստառը զարդարում է սրճարանի մուտքը: Նա ևս երազում էր աշխատանքի մասին, իսկ ամուսնանալ որոշել է 3 տարի հետո:
Նշենք, որ ծրագրի ընդհանուր արժեքը 300 հազար եվրո է։ Այն համաֆինանսավորվում է Կարիտաս Ավստրիայի և Ավստրիայի զարգացման գործակալության կողմից։ Կենտրոնի առաքելությունն է ծառայել հաշմանդամություն ունեցող երեխաներին և նրանց ընտանիքներին, նպաստել ներառական հասարակության կայացմանը:
«Արեգակ» փուռ-սրճարանը, լինելով այդ առաքելության անմիջական կրողը, հաշմանդամություն ունեցող երիտասարդների հնարավորությունները բացահայտելու, ներառական միջավայր ստեղծելու, նոր գիտելիքներ տրամադրելու օրինակելի տարածք է, որտեղ մատուցվում են համեղ հացեր, թխվածքներ և սուրճ:
