ԵՐԵՎԱՆ, 28 օգոստոսի — Sputnik. Հայաստանը պետք է անցնի համընդհանուր ներառական համակարգի։ Այս մասին այսօր ասաց ՀՀ կրթության և գիտության նախարար Արայիկ Հարությունյանը դպրոցների տնօրենների ամենամյա խորհրդակցության ընթացքում։
Նա նշեց, որ բոլոր դպրոցներում այդ համակարգին անցնելն իր համար առաջնահերթություն է լինելու։ Նախարարը կարծում է, որ կրթության ներառական համակարգը կարող է ընկալել միայն այն հասարակությունը, որտեղ տիրում է սիրո, համերաշխության ու փոխադարձ օգնության մթնոլորտ։
«Ներառական կրթության համընդհանուր ներառման հասնելը պետք է ոչ միայն հաշմանդամություն ունեցող աշակերտներին, այլև ողջ հասարակությանը»,- ասաց նա։
Հարությունյանն ընդգծեց, որ այդ համակարգին անցնելուց հետո նաև ուսուցչի օգնականի ինստիտուտ կստեղծվի։
Նշենք, որ Արևելյան Եվրոպայի ու ԱՊՀ-ի երկրները բարձր են գնահատել համընդհանուր ներառական կրթությանն անցնելու հայաստանյան փորձը։ Հիմա այդ համակարգը քիչ թվով դպրոցներում է գործում, քանի որ շենքերի մեծ մասը հարմարեցված չէ հաշմանդամություն ունեցող երեխաների տեղաշարժի համար, և այդ ուղղությամբ մասնագիտացված կադրերի պակաս կա։
