ԵՐԵՎԱՆ, 13 սեպտեմբերի — Sputnik. Ռոբերտ Քոչարյանի հետ «խաղ» են վերադարձել նաև ՀՀ նախկին նախագահներ Լևոն Տեր-Պետրոսյանն ու Սերժ Սարգսյանը, Sputnik Արմենիա մամուլի կենտրոնում ասաց քաղտեխնոլոգ Կարեն Քոչարյանը։
Նրա խոսքով` առաջին անգամ 2018 թվականի մայիսին էր, որ Հայաստանի քաղաքական դաշտում «բերմուդյան եռանկյունի» չկար` Լևոն Տեր-Պետրոսյան, Ռոբերտ Քոչարյան, Սերժ Սարգսյան։ Սա իրական հնարավորություն դարձավ մյուս քաղաքական ուժերի հաջող գործունեության համար։
Սակայն Ռոբերտ Քոչարյանի նկատմամբ քրեական գործի հարուցումը, ըստ նրա, բացեց «Պանդորայի արկղը»։ Նախկին նախագահներից մեկի` քաղաքական դաշտ վերադառնալը մեխանիկորեն ներքաշեց նաև մյուս երկուսին։
«Այստեղ մի հարց է առաջանում, թե ինչպես են նրանք ներկայացվելու հասարակական կյանքում` պասի՞վ, հետնաբեմո՞ւմ, թե՞ ակտիվ։ Բայց եթե մեկը խաղի մեջ է, ուրեմն մյուս երկուսը` նույնպես», — նշեց փորձագետը։
Ինչ վերաբերում է Ռոբերտ Քոչարյանին, ապա նա ընտրազանգվածային ռեսուրս փաստացի չունի։ Նրա վարկանիշը շատ ցածր է, քաղտեխնոլոգը կասկածում է, որ այն կբարձրանա։ Սակայն երկրորդ նախագահն այլ հնարավորություններ ունի։
«Բոլոր մյուս հարցերում նա այնպիսի զգալի ռեսուրսներ ունի, որոնց չեն կարող հասնել անգամ մի քանի կուսակցությունները։ Նկատի ունեմ և՛ ֆինանսական, և՛ աշխարհաքաղաքական հնարավորությունները, տարբեր էլիտաների վրա ազդեցության լծակները, այդ թվում` ուժային և օլիգարխիայի վրա», — ասաց Քոչարյանը։
Փորձագետի խոսքով` հարցն այն է, թե ինչպես է Ռոբերտ Քոչարյանը պայքարելու գործող իշխանության հետ։ Ընտրություններին նա հնարավորություններ չունի։ Այլ հարց է, եթե նա փորձի թիմ ձևավորել և առաջադրել այլ թեկնածուի։
Այդ մարդը քաղաքական ուժ է ներկայացնելու, որի կայացմանը կօգնի Ռոբերտ Քոչարյանը։
Ներկա պահին, փորձագետի կարծիքով, Ռոբերտ Քոչարյանը չի ցանկանում, որ իրեն ասոցացնեն ՀՀԿ-ի հետ։ Նա առայժմ սեփական ռեսուրսներն է օգտագործում։
Պատերազմը բուռն շրջանում է։ Յուրաքանչյուրը փորձում է իր ռեսուրսներն օգտագործել, ցույց տալ «մկանները»։ Քոչարյանն արեց ամեն բան, որպեսզի Կրեմլը շնորհավորի նրա ծննդյան օրը, ՀՀ վարչապետ Նիկոլ Փաշինյանը հրապարակում ցույց է տալիս, որ վայելում է ընտրազանգվածի աջակցությունը։
«Դեռ վաղ է խոսել այս կամ այն կողմի հաջողակ լինելու մասին։ Սկսվել է գործընթաց, որը, կարծում եմ, երկար կտևի։ Եվ միայն վերջում պարզ կլինի, թե ով հաջողության կհասնի», — նշեց քաղտեխնոլոգը։
Նշենք` Ռոբերտ Քոչարյանն այսօր հայտարարել է. «Փաշինյանը կփոշմանի, որ որոշել է հետս «գլուխ դնել»
Հիշեցնենք, որ Ռոբերտ Քոչարյանը հուլիսի 26-ին Հատուկ քննչական ծառայություն էր ներկայացել վկայի կարգավիճակով՝ հարցաքննության։ Նույն օրը Ռոբերտ Քոչարյանին մեղադրանք էր առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը։
