ԵՐԵՎԱՆ, 11 սեպտեմբերի — Sputnik. 1915 թվականին Օսմանյան կայսրության իրագործած Հայոց ցեղասպանության զոհերի հիշատակին նվիրված Ծիծեռնակաբերդի հուշահամալիրը խորհրդանշում է հայ ժողովրդի մի կարևոր հատկություն, որը շատ ողջունելի է ու որը լիովին համապատասխանում է Ֆրանկոֆոնիայի կարգախոսին։ Այսօր այսպիսի խոստովանություն արեց Ֆրանկոֆոնիայի միջազգային կազմակերպության գլխավոր քարտուղար Միկաել Ժանը՝ Ծիծեղնակաբերդ այցելությունից հետո։
«Հայ ժողովուրդը չի հանձնվում մահվանը, ողջունում է կյանքն ու հաղթում կյանքում։ Ես Ծիծեռնակաբերդում էի ու ուզում եմ ողջունել ժողովրդին, որը չի ցանկանում մահանալ», – ասաց Ժանը Երևանում ՀՀ արտգործնախարար Զոհրաբ Մնացականյանի հետ մամուլի ասուլիսի ընթացքում։
Նա հայտնեց, որ մարդկությունը պետք է ապրի խաղաղ ու համերաշխ, բոլորը պետք է կարողանան խաղաղ ապրել իրար հետ։
«Ապրել միասին». սա այն կարգախոսն է, որի ներքո Երևանում կանցկացվի Ֆրանկոֆոնաիայի միջազգային կազմակերպության գագաթնաժողովը», – նշեց Միկաել Ժանը։
Նա շնորհակալություն է հայտնել Հայաստանին այդ կարգախոսի համար, ընդգծելով, որ առաջիկա գագաթնաժողովի «Ապրել միասին» խորագիրը աշխարհի, բարգավաճման համատեքստում, կարևորագույններից է։
Ժանն ընդգծեց, որ բոլոր երկրների ղեկավարները, որոնք Հայաստանում հյուրընկալվելու են գագաթնաժողովի համար, կքննարկեն աշխարհի խաղաղության պահպանման կարևորագույն ու արդիական հարցերը։
Նա այցելել է նաև ԹՈՒՄՈ ստեղծարարական տեխնոլոգիաների կենտրոն, շփվել է կենտրոնի սաների հետ։ Ժանը չի թաքցրել, որ հաճելիորեն զարմացած է։
Ֆրանկոֆոնիայի գագաթնաժողովը տեղի կունենա հոկտեմբերի սկզբին։ Ակնկալվում է, որ Հայաստանը կհյուրընկալի Ֆրանսիայի նախագահ Էմանուել Մակրոնին, Կանադայի վարչապետ Ջասթին Տրյուդոյին և այլ բարձրաստիճան անձանց։ Ընդհանուր առմամբ Հայաստան է ժամանելու մինչև 150 պատվիրակություն` 84 մասնակից, ասոցացված անդամ ու դիտորդ երկրներից։
