ԵՐԵՎԱՆ, 11 սեպտեմբերի — Sputnik. ՀՀ առաջին նախագահ Լևոն Տեր-Պետրոսյանը կհարցաքննվի Մարտի 1-ի գործով։ Այսօր լրագրողների հետ հանդիպման ժամանակ ասաց Հատուկ քննչական ծառայության պետ Սասուն Խաչատրյանը։
«Տեր-Պետրոսյանը կհրավիրվի և կհարցաքննվի։ Նրա դատավարական կարգավիճակը կորոշի քննչական մարմինը»,- ասաց Խաչատրյանը։
Նշենք` ՀՔԾ պետը հայտնել էր նաև, որ անպայման կհարցաքննվի Սերժ Սարգսյանը։
Հիշեցնենք` 2008 թվականի փետրվարի 24-ին Հայաստանի ԿԸՀ-ն հայտարարել էր, որ ընտրություններում հաղթել է Սերժ Սարգսյանը։ Բողոքի ակցիայի մասնակիցները պահանջում էին վերահաշվարկել քվեները։
Մարտի 1-ի գիշերը Ազատության հրապարակում ոստիկանական ուժերը օպերատիվ-հետախուզական գործողություններ էին իրականացրել «տեղանքը ստուգելու» համար, որի հետևանքով հազարավոր ցուցարարների հեռացրել էին հրապարակից։
Մարտի 1-ի երեկոյան Զինված ուժերի և ոստիկանության ստորաբաժանումները Երևանի կենտրոնական փողոցներում զենքի, պայթուցիկ սարքերի և հատուկ միջոցների օգնությամբ ցուցարարներին ցրելու համար հատուկ գործողություններ էին իրականացրել։ Արդյունքում հարյուրավոր մարդիկ վնասվածքներ էին ստացել, մահացել էին 8 քաղաքացիական անձ և 2 ոստիկան։
10 տարի չբացահայտված մնացող քրեական գործը թավշյա հեղափոխությունից հետո ՀՔԾ-ում նոր թափ է ստացել։
Մարտի 1-2-ի առնչությամբ քրեական գործեր են հարուցվել Ռոբերտ Քոչարյանի, Միքայել Հարությունյանի, Յուրի Խաչատուրովի դեմ։
