ԵՐԵՎԱՆ, 11 սեպտեմբերի – Sputnik. Ե՞րբ կկայանան արտահերթ խորհրդարանական ընտրությունները։ ԱԺ նախագահ Արա Բաբլոյանը դժվարանում է կանխատեսել: Լրագրողների հետ զրույցում ԱԺ նախագահը նշեց, որ այդ հարցով ստեղծված աշխատանքային խումբը նույնիսկ աշխատանքները չի ավարտել։
«ԱԺ-ում ստեղծել ենք համապատասխան աշխատանքային խումբ, որն աշխատում է օրենսդրության բարեփոխումների վրա: Աշխատանքները չեն ավարտվել, ու շատ անելիքներ կան»,- ասաց նա։
Ինչ վերաբերում է Սահմանադրության փոփոխությանը, որով կառավարությունն առաջարկում է ընդունել խորհրդարանի ինքնալուծարման դրույթ, Արա Բաբլոյանը չցանկացավ մեկնաբանել` ասելով, որ խորհրդարանը սահմանադրական փոփոխությունների առաջարկությունների փաթեթը դեռ չի ստացել։
«Առաջարկությունը ստանալուց հետո նոր տեսակետ կլինի։ Սա քաղաքական գործընթաց է և քաղաքական ուժերի քննարկման ու կոնսեսուսի արդյունք կարող է լինել։ Սա չի կարող լինել մեկ կամ երկու մարդու կամ քաղաքական գործչի ցանկությամբ: Կոնսենսուս կարող է լինել քաղաքական ու հասարակական ուժերի քննարկումների և բանակցությունների միջոցով»,- ասաց Բաբլոյանը։
Նշենք, որ ՀՀ վարչապետ Նիկոլ Փաշինյանը սեպտեմբերի 2–ին կրկին անդրադարձել էր ԱԺ արտահերթ ընտրությունների թեմային ու ասել, որ երկու տարբերակ է դիտարկում` հանրաքվե ու համաձայնություն խորհրդարանական ընտրությունների միջև։ Վարչապետը հակված է հանրաքվեի անցկացմանը, քանի որ հաշվի է առնում ոչ այդքան վստահելի փորձն ու մտավախություն ունի, որ հետագայում պայմանավորվածությունները կարող են խախտվել։
