ԵՐԵՎԱՆ, 7 սեպտեմբերի — Sputnik. Ռուսաստանի, Թուրքիայի և Իրանի առաջնորդները հռչակագիր են ընդունել Թեհրանում՝ Սիրիայի հարցով գագաթաժողովի արդյունքում, հայտարարել է Իրանի նախագահ Հասան Ռոուհանին։
«Այսօր մենք հռչակագիր ենք ընդունել։ Այն բացահայտ որոշում է հետագա փոխգործակցության մեր ուղին։ Մենք կշարունակենք ջանքեր գործադրել ոչ միայն Սիրիայում, այլ նաև ամբողջ տարածաշրջանում կայունություն և անվտանգություն հաստատելու համար», – ասել է Ռոուհանին Թեհրանում ՌԴ–Իրան–Թուրքիա գագաթաժողովի արդյունքում։
Միաժամանակ ՌԴ նախագահ Վլադիմիր Պուտինը գագաթաժողովից հետո հայտարարել է, որ Սիրիայում ահաբեկչության վերջնական չեզոքացումը պարտադիր գերակայություն է։ Նա նշեց, որ Ռուսաստանը, Իրանը և Թուրքիան կշարունակեն ակտիվ ջանքերն` ուղղված ահաբեկչության դեմ պայքարին, միջսիրիական երկխոսությունը շարունակելուն և մարդասիրական իրավիճակը բարելավելուն։
Այդ խնդիրների լուծման համար լայնորեն կօգտագործվեն «Աստանային ձևաչափի հնարավորությունները», որը պահպանում է պահանջվածությունը` որպես Սիրիայում նորմալ կյանք ապահովելու արդյունավետ գործիք։
Պուտինը նաև անթույլատրելի է համարում, երբ քաղաքացիական բնակչությանը պաշտպանելու պատրվակով ահաբեկիչներին ցանկանում են դուրս բերել հարվածի տակից, ինչպես նաև վնաս հասցնել Սիրիայի կառավարական զորքերին։
«Հենց դրան են ուղղված նաև սիրիական զորքերի կողմից թունավորող նյութեր կիրառելը բեմականացնելու փորձերը։ Մենք անհերքելի ապացույցներ ունենք, որ գրոհայինները պատրաստվել են նման գործողությունների, նման սադրանքների», – ասել է Պուտինը։
Ավելի վաղ Ռուսաստանի ԱԳՆ–ը հաղորդել Սիրիայում քիմիական հարձակումը գրոհայինների կողմից նախապատրաստելու ապացույցների առկայության մասին։
