ԵՐԵՎԱՆ, 7 սեպտեմբերի — Sputnik. ՀՀ ոստիկանությունը գրավոր ծանուցում է ստացել ռուսական կողմից ՀՀ պաշտպանության նախկին նախարար Միքայել Հարությունյանի նկատմամբ հետախուզումը դադարեցնելու մասին։ Այս մասին Sputnik Արմենիային հայտնեցին ոստիկանության մամուլի ծառայությունից։
Հիշեցնենք, որ նախկին նախարարի նկատմամբ միջազգային հետախուզում էր հայտարարվել 2008 թվականի մարտին սահմանադրական կարգը տապալելու մեղադրանքով։ Ավելի ուշ ռուսական ԶԼՄ-ները հայտնեցին, որ ռուսական կողմն իր տարածքում դադարեցրել է Հարությունյանի հետախուզումը։
«ՀՀ ոստիկանությունը ստացել է հետախուզումը դադարեցնելու մասին գրավոր դիմումը», — նշեցին մամուլի ծառայությունից։
Մարտի 1-ի դեպքերի վերաբերյալ քրեական գործի շրջանակում մեղադրանքներ են առաջադրվել նաև ՀԱՊԿ գլխավոր քարտուղար Յուրի Խաչատուրովին և ՀՀ երկրորդ նախագահ Ռոբերտ Քոչարյանին։ Խաչատուրովին ազատ են արձակել գրավի դիմաց։ Քոչարյանը կալանավորվել էր, բայց Վերաքննիչ դատարանում բողոքարկվել էր կալանավորումը։
2008 թվականի մարտի 1-ին և 2-ին նախագահական ընտրություններից հետո Երևանում շուրջօրյա ցույցեր սկսվեցին։ Դրանք ցրելու համար իշխանությունը ուժ կիրառեց։ Գործողությունների ընթացքում մահացան 10 մարդ։ Մեղավորները մինչ օրս չեն պատժվել։
