ԵՐԵՎԱՆ, 5 սեպտեմբերի — Sputnik. Վերջին 1,5 տարվա ընթացքում Հայաստանում գրանցած տնտեսական կտրուկ աճի արդյունքում Հայաստանը հայտնվել է ֆրանչայզինգով հետաքրքրվող միջազգային կորպորացիաների տեսադաշտում։ Այս մասին այսօր լրագրողների հետ զրույցում ասաց «Բիզնես Արմենիա» հիմնադրամի տնօրեն Արմեն Ավակ Ավակյանը։
Համաշխարհային բանկը կանխատեսում է, որ 2018 թվականին Հայաստանի ՀՆԱ-ն աճելու է ու հասնելու է 4,1% մակարդակի։ 2017 թվականին Հայաստանի տնտեսությունն աճել է 7,5%-ով, իսկ գնանկումը կազմել է 1%։ 2018 թվականին պետական բյուջեում նախատեսված է ՀՆԱ-ի 4,5% աճ գրանցել։
Նրա խոսքով` մշտապես աշխատանքներ են իրականացվում, որպեսզի արտաքին ներդրողներն իմանան Հայաստանի բիզնես-առավելությունների մասին։ Երկրում ամենաեկամտաբեր ոլորտներն են տեղեկատվական տեխնոլոգիաները, զբոսաշրջությունն ու գյուղատնտեսությունը։
«Մենք մտադիր ենք մինչ 2020 թվականը մեծացնել զբոսաշրջիկների հոսքն ու հասցնել մինչև տարեկան 2,5 միլիոն այցի` նախկին 1,5 միլիոնի փոխարեն», — ընդգծեց նա։
Ավակյանը հայտնեց, որ ակտիվություն է նկատվում ֆրանչայզինգի ոլորտում։ Նա ասաց, որ բրազիլացի ներդրողները հետաքրքրված են արտասահմանում գտնվող հայկական ռեստորանների ֆրանչայզինգով։
ՀՀ տնտեսական զարգացման և ներդրումների նախարար Արծվիկ Մինասյանն իր հերթին նշեց, որ կառավարությունն անում է ամեն բան, որպեսզի բիզնես վարելու պայմաններն ավելի հարմար դառնան։ Նրա խոսքով` շուտով ԱՄՆ-ում Հայաստանի առևտրային ներկայացուցչություն է բացվելու, որը կօգնի ավելի սերտ աշխատել ամերիկացի ներդրողների հետ։
«Մենք կփորձենք պայմանավորվածություն ձեռք բերել ներդրումների փոխպաշտպանության, նաև կրկնակի հարկումից խուսափելու հնարավորությունների վերաբերյալ», — ընդգծեց նախարարը։
Նա կրկին հաստատեց, որ կառավարությունը ԱՄՆ-ից մեկ միլիարդ դոլարի ներդրումային առաջարկություններ է ստացել, սակայն միայն 240 միլիոնն է իրատեսական համարում։ Արդեն ձևավորվել են ներդրումային նախագծերը հիմնականում բարձր տեխնոլոգիաների ոլորտում, լոգիստիկայի համակարգում, գյուղատնտեսական հումքի վերամշակման, առողջապահության ու կրթության ոլորտներում, ամփոփեց Մինասյանը։
Հիշեցնենք՝ ավելի վաղ Ազգային վիճակագրական ծառայությունը հրապարակել էր հաշվետվություն, համաձայն որի` 2017 թվականին Հայաստանում ՀՆԱ-ն 7,5% է կազմել։ Տարեկան ՀՆԱ-ն բացարձակ արտահայտմամբ կազմել է 5 տրիլիոն 580 միլիարդ 116 միլիոն 900 հազար դրամ։
Նշենք, որ 7,5%-ը Հայաստանում ՀՆԱ-ի ամենամեծ ցուցանիշն է 2008 թվականի ճգնաժամին նախորդող տարվանից հետո, այն նաև ամենամեծն է տարածաշրջանում։
Միաժամանակ այս տարվա ՀՆԱ-ի աճի հետ կապված տարբեր կանխատեսումներ են արվում։ Եվրասիական զարգացման բանկը կանխատեսում է 3% աճ, իսկ Կենտրոնական բանկը պնդում է, որ 4,7%-ից 5,8% աճ է ակնկալվում։
