ԵՐԵՎԱՆ, 3 սեպտեմբերի — Sputnik. Հայաստանում թուրքական հագուստի արտոնյալ մաքսազերծում չպետք է լինի։ Այս մասին այսօր լրագրողներին ասաց տնտեսական զարգացման և ներդրումների նախարար Արծվիկ Մինասյանը։
Ավելի վաղ հագուստի և այլ ապրանքների փոքր խմբաքանակների մաքսային ձևակերպումն անցկացնում էր «Նորֆոլկ Քոնսալթինգ» ընկերությունը, որը ստեղծվել էր Պետեկամուտների կոմիտեի նախկին ղեկավարների մասնակցությամբ (հարկային ու մաքսային)։ Առևտրականները կարող էին ապրանքը մաքսազերծել միայն այդ ընկերությունում։ Փոխարենը «Նորֆոլկը» նվազեցնում էր ապրանքների մաքսային արժեքը` թույլ տալով առևտրականներին ավելի քիչ հարկեր վճարել։ Մասնավորապես, հագուստը ձևակերպվում էր ոչ թե հատով, այլ կիլոգրամով։
Հուլիսից այդ կարգը չի գործում, և ապրանքը պետք է ձևակերպել բոլոր կանոններով։ Միաժամանակ դրանից պետք է վճարել նաև բոլոր անհրաժեշտ հարկերը։ Հագուստը չի թանկանա՞։
«Հասկանում եմ, և ամեն դեպքում մաքսազերծման նախկին կարգն անարդար էր։ Բացի այդ, այն խանգարում է նաև տեղական արտադրությանը։ Ինչո՞ւ տեղի տրիկոտաժից կամ հագուստից պետք է գանձել բոլոր հարկերը, իսկ ներկրվողից` ոչ։ Այդ դեպքում ինչպե՞ս պետք է աշխատեն մեր կարի ֆաբրիկաները», — ասաց Մինասյանը։
Նա հիշեցրեց, որ ՊԵԿ-ում ստեղծվել են ստորաբաժանումներ, որոնք կօգնեն մանր ներկրողներին բեռների ձևակերպման հարցում։
Նշենք, որ այսօր «Առինջ մոլի» առևտրականները բողոքի ակցիա էին անցկացնում կառավարության շենքի մոտ` պահանջելով պահպանել կիլոգրամներով մաքսազերծումը (3 դոլար` 1 կգ հագուստի համար, անկախ դրա իրական արժեքից)։
