ԵՐԵՎԱՆ, 30 օգոստոսի — Sputnik. Ադրբեջանը դիմել է Ինտերպոլին՝ ամերիկահայ Դեն Բիլզերյանի նկատմամբ միջազգային հետախուզում հայտարարելու պահանջով։ Այս մասին հայտնում են ադրբեջանական լրատվամիջոցները` հղում անելով Ադրբեջանի գլխավոր դատախազության տարածած հայտարարությանը։
Գլխավոր դատախազությունը «պարզել» է, որ այս տարվա օգոստոսի 28-ին Բիլզերյանը «Հայաստանի տարածքում մի խումբ անձանց հետ հանցավոր պայմանավորվածություն ձեռք բերելով` կազմակերպված հանցախմբի կազմում խախտել է Ադրբեջանի տարածքային ամբողջականությունը, ապօրինաբար հատել է Ադրբեջանի Հանրապետության սահմանները` հայտնելով Ղարաբաղում»։
«Ադրբեջանի օկուպացված հողերում նա ապօրինաբար ձեռք է բերել նռնակներ, հրացան, հրազենային զենք ու ցուցադրաբար կրակ է բացել»,- նշված է հաղորդագրությունում։
«Պոկերի արքայի» նկատմամբ քրեական գործ է հարուցվել։
Նշենք, որ Բիլզերյանն Արցախում ցուցադրել էր կրակելու հմտությունները։
Բիլզերյանի հետ Արցախ էին մեկնել նաև նրա հայրը, եղբայրը, ընկերուհիները, ինչպես նաև Ռոբերտ Քոչարյանի որդին՝ Լևոն Քոչարյանը։
Բիլզերյանը Հայաստան էր ժամանել օգոստոսի 27-ի առավոտյան մասնավոր ինքնաթիռով։
«Զվարթնոց» օդանավակայանում նրան դիմավորել էին լրագրողներն ու երկրպագուները։ Նա հասցրել է հայկական անձնագիր ստանալ, զբոսնել Հայաստանի մայրաքաղաքում։
Զբոսանքի ժամանակ նրան ուղեկցում էին երկու գեղեցկուհիներն ու ՀՀ երկրորդ նախագահ Ռոբերտ Քոչարյանի կրտսեր որդին` Լևոնը։
Օգոստոսի 27-ին նրանք մեկնել էին Սևան, որտեղ Բիլզերյանի ընկերուհին լուսանկարվել էր Սիրուշոյի հետ։
