ԵՐԵՎԱՆ, 24 օգոստոսի — Sputnik. Գերմանիայի կանցլեր Անգելա Մերկելը կարծում է, որ Վրաստանն ավելի մոտ է դառնում ՆԱՏՕ–ին, սակայն ինքն անձամբ Վրաստանին առաջիկայում այնտեղ չի տեսնում։ Այս մասին Մերկելն ասել է Ջավախիշվիլիի անվան Թբիլիսիի պետական համալսարանի ուսանողների հետ հանդիպման ժամանակ, հայտնում է «Ռուսթավի 2» հեռուստաընկերությունը։
«Մենք պետք է ավելի անկեղծ լինենք։ Աբխազիայի ու Հարավային Օսեթիայի հարցերի պատճառով առաջիկայում Վրաստանի` ՆԱՏՕ–ի անդամ դառնալու հնարավորություն չեմ տեսնում», – ասել է Մերկելը։
Կանցլերը նշել է, որ Գերմանիայի դիրքորոշումն այսպիսինն է։ Միաժամանակ նա ընդգծել է, որ Թբիլիսիի ու Դաշինքի հարաբերություններն ավելի մտերիմ են դարձել։
«Վրաստանը դանդաղ մոտենում է ՆԱՏՕ–ին ու ԵՄ–ին. ահա այս հարցի պատասխանը», – ասել է Մերկելը։
Հիշեցնենք` Վրաստան–ՆԱՏՕ համագործակցության գործող փաթեթը կողմերն ընդունել են 2014 թվականին Ուելսում կայացած գագաթնաժողովի ընթացքում։
Գերմանիայի կանցլեր Անգելա Մերկելի Հարավային Կովկաս տարածաշրջանային այցը սկսվել է Վրաստանից օգոստոսի 23–ին։
Մերկելի պատվիրակության կազմում ընդգրկվել են կանցլերի` արտաքին քաղաքականության և անվտանգության հարցերի խորհրդական Յան Հեքերը, Ֆինանսական և տնտեսական քաղաքականության գծով խորհրդական Լարս-Հենդրիկ Ռյոլլերը, եվրոպական քաղաքականության գծով խորհրդական Ուվե Կորզեպիուսը, կանցլերի աշխատակազմում Հարավային Կովկասի բաժնի ղեկավար Մաթիաս Լյութենբերգը։
