Սարգսյանը նշում է, որ Մերկելի հայաստանյան այցը բացառիկ նշանակություն ունի, որովհետև մինչ այս որևէ կանցլեր Հայաստան չի եկել։
«Մերկելի այցը պայմանավորված է աշխարհաքաղաքական մի շարք իրադարձություններով ու զարգացումներով։ Ես այդ այցը կկապեի նաև Ռուսաստանի և Գերմանիայի հարաբերությունների բարելավման հետ»,- ասաց Սարգսյանը։
Հիշեցնենք, որ ԳԴՀ-ի կանցլեր Անգելա Մերկելն այսօր` օգոստոսի 24-ին, աշխատանքային այցով ժամանեց Երևան։ Գերմանիայի կառավարության ղեկավարին օդանավակայանում դիմավորեց ՀՀ վարչապետ Նիկոլ Փաշինյանը։
Կանցլերը Երևան ժամանեց Թբիլիսիից, որտեղ նույնպես երկու օր էր անցկացրել։
Մերկելի պատվիրակության կազմում ընդգրկվել են կանցլերի` արտաքին քաղաքականության և անվտանգության հարցերի խորհրդական Յան Հեքերը, Ֆինանսական և տնտեսական քաղաքականության գծով խորհրդական Լարս-Հենդրիկ Ռյոլլերը, եվրոպական քաղաքականության գծով խորհրդական Ուվե Կորզեպիուսը, կանցլերի աշխատակազմում Հարավային Կովկասի բաժնի ղեկավար Մաթիաս Լյութենբերգը։
